“Për Kosovën Republikë” i Enver Dugollit promovohet mes studentëve në ETH Zürich

Në ambientet e ETH Zürich u promovua libri “Për Kosovën Republikë” i autorit Enver Dugolli, një vepër që sjell kujtime, dëshmi dhe përjetime personale nga burgosja politike dhe përpjekjet për lirinë e Kosovës.

Takimi u organizua nga Shoqata e Studentëve Shqiptarë në Cyrih, në bashkëpunim me GESS Who!, shoqatën studentore të shkencave humane, politike dhe shoqërore në ETH Zürich. Ai bëri bashkë studentë, ish-të burgosur politikë dhe pjesëmarrës të tjerë, duke krijuar një hapësirë bashkëbisedimi për historinë dhe domethënien e lirisë.

Në hapje, përfaqësuesit e studentëve, Idlir Begalla dhe Hana Syla, prezantuan bashkëpunimin mes dy shoqatave dhe nismën e klubit të leximit “Vargje të lira”. Përmes leximit dhe diskutimeve, kjo nismë synon të ndërthurë gjuhën dhe kulturën me jetën akademike, duke nxitur shkëmbimin e ideve dhe të përvojave.

Hana Syla tregoi se lidhja me historinë e rrëfyer në libër ishte krijuar edhe gjatë një udhëtimi studimor në Kosovë. Gjatë vizitës në Muzeun e Burgut të Idealëve në Prishtinë, një grup studentësh të GESS Who! kishte takuar Enver Dugollin dhe Shemsi Sylën. Përballja me hapësirat e ish-burgut dhe dëshmitë e tyre e kishte bërë më të prekshme për studentët përvojën e represionit politik.

Dëshmi që duhen përcjellë te brezat e rinj

Duke folur për librin, Shemsi Syla, ish i burgosur politik, dhe mik i autorit të librit, theksoi se përjetimet e përshkruara në të mund të jenë të vështira për t’u kuptuar nga brezi i sotëm. Sipas tij, rrëfimet për burgosjen dhe represionin janë aq të rënda, sa lexuesi mund ta ketë të vështirë të besojë se ato kanë ndodhur vërtet.
Ai u ndal veçanërisht te mosha e re në të cilën Dugolli u përball me arrestimin dhe burgosjen, duke e lidhur përvojën e tij me sakrificën e një brezi për të drejtat dhe lirinë e shqiptarëve të Kosovës.

Syla nënvizoi gjithashtu nevojën që ish-të burgosurit politikë t’i shkruajnë përjetimet e tyre, duke lënë dëshmi për brezat që vijnë.

Një dimension tjetër të kësaj historie solli Nexhat Maloku, ish i burgosur dhe i cili foli për vështirësitë që i prisnin ish-të burgosurit politikë edhe pas lirimit. Ai shpjegoi se frika nga arrestimi i përsëritur, pamundësia për t’u punësuar dhe kushtet e rënda ekonomike i kishin detyruar shumë prej tyre të largoheshin nga Kosova.
Sipas Malokut, e kaluara si i burgosur politik bëhej pengesë për ndërtimin e një jete normale. Në këtë kontekst, ai shpjegoi edhe vendosjen e një numri të madh të ish-të burgosurve politikë në Zvicër.

Dugolli: Liria ishte ëndrra dhe ideali ynë

Në bashkëbisedimin me pjesëmarrësit, Enver Dugolli u ndal te besimi në ideal dhe këmbëngulja për ta ndjekur atë, edhe në rrethana kur realizimi i tij dukej i largët.
“Në atë kohë, liria e Kosovës ishte vetëm ëndrra dhe shpresa jonë. Arritja e lirisë ishte qëllimi, ëndrra dhe ideali ynë, por ajo nuk dukej askund në horizont”, u shpreh ai.

Autori theksoi se besimi duhet të shoqërohet me punë dhe vendosmëri, duke e lidhur këtë mesazh me përvojën e brezit të tij.
Në qendër të diskutimit ishte edhe mënyra se si njeriu arrin ta ruajë dinjitetin dhe lirinë e brendshme përballë izolimit. Në një fragment të librit, të sjellë gjatë hyrjes së takimit, Dugolli shkruan: “Ata më kishin burgosur trupin, por pa e vënë re po më armatosnin shpirtin”.

Promovimi në ETH Zürich krijoi kështu një urë mes dëshmitarëve të një periudhe të rëndësishme historike dhe studentëve që sot e njohin atë përmes librave, vizitave dhe rrëfimeve të drejtpërdrejta. Përmes “Për Kosovën Republikë”, përvoja personale e autorit u bë pikënisje për një diskutim më të gjerë mbi qëndresën, mërgimin dhe ruajtjen e kujtesës historike.

Gjatë bashkëbisedimit, studentët shqiptarë dhe ndërkombëtarë parashtruan pyetje të ndryshme, duke shfaqur interes për përjetimet e autorit dhe idealet që e kishin udhëhequr. Njëra prej tyre ishte nëse ai do të luftonte sërish për një ideal të tillë, siç ishte atëherë Republika e Kosovës. Studentët u interesuan gjithashtu se cilat këngë këndoheshin në burg dhe si e përballonin të burgosurit jetën e përditshme në izolim.

Mirishahe Hiler Limani

The post “Për Kosovën Republikë” i Enver Dugollit promovohet mes studentëve në ETH Zürich appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.