Zvicër: Neuchâteli reformon maturën, gjimnazi do të zgjasë katër vjet

Kantoni zviceran i Neuchâtelit planifikon të reformojë sistemin e maturës gjimnaziale, duke e organizuar atë në një program katërvjeçar dhe duke u mundësuar nxënësve të fillojnë gjimnazin pas vitit të 10-të ose të 11-të të shkollimit të detyrueshëm.

Reforma, e cila pritet të hyjë në fuqi në vitin 2032, parasheh një sistem të kombinuar, ku pranimi në gjimnaz do të bëhet përmes kritereve të drejtpërdrejta ose provimit pranues.

Sipas parashikimeve, rreth 400 nxënës do të fillojnë gjimnazin pas vitit të 10-të, ndërsa rreth 170 të tjerë pas vitit të 11-të. Autoritetet synojnë që përmes kritereve më të qarta të pranimit të ulin shkallën e dështimit dhe braktisjes së shkollimit gjatë vitit të parë të gjimnazit, e cila aktualisht në këtë kanton arrin në 21 për qind.

Ministrja e Arsimit, Crystel Graf, tha se reforma synon të krijojë më shumë fleksibilitet dhe t’i përshtatë mundësitë e shkollimit me ritmin dhe nevojat e nxënësve.

Ndërkohë, sindikatat e mësimdhënësve e kundërshtojnë modelin e propozuar, duke kërkuar që të gjithë nxënësit ta përfundojnë vitin e 11-të para se të fillojnë katër vitet e gjimnazit. Sipas tyre, kjo do të respektonte më mirë ritmin e zhvillimit të nxënësve dhe do të ulte stresin.

Reforma pritet të sjellë edhe ndryshime financiare dhe organizative, ndërsa kostoja neto shtesë vjetore për kantonin vlerësohet në rreth 2,3 milionë franga zvicerane. Nuk parashihet ndërtimi i objekteve të reja shkollore.

Propozimi është në konsultim publik deri më 18 dhjetor.

The post Zvicër: Neuchâteli reformon maturën, gjimnazi do të zgjasë katër vjet appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.