Nismë në Zvicër për 18 javë pushim prindëror për të dy prindërit

Nisma popullore “Shoqëri dhe ekonomi e fortë falë pushimit prindëror”, e njohur si “Familienzeit-Initiative”, ka dorëzuar 112,517 nënshkrime të vlefshme në Kancelarinë Federale në Bernë, raporton albinfo.ch. Me këtë numër është tejkaluar dukshëm pragu prej 100 mijë nënshkrimesh të nevojshme për një iniciativë federale, përcjell albinfo.ch.

Nisma kërkon që të dy prindërit me përgjegjësi kujdestarie të kenë nga 18 javë pushim prindëror të paguar pas lindjes së fëmijës. Deri në një të katërtën e kësaj kohe do të mund të merrej bashkërisht nga të dy prindërit, por jo të transferohej nga njëri te tjetri.

Nisma mbështetet nga një koalicion i gjerë që përfshin përfaqësues të partive Die Mitte, të Gjelbrit, GLP, SP, EVP dhe FDP, si dhe organizatën Alliance F dhe federatën sindikale Travailsuisse.

Aktualisht, nënat e punësuara në Zvicër kanë të drejtë në 14 javë kompensim të lehonisë, ndërsa pushimi i atësisë prej dy javësh u miratua nga votuesit në vitin 2020 dhe hyri në fuqi në fillim të vitit 2021. /Albinfo.ch

The post Nismë në Zvicër për 18 javë pushim prindëror për të dy prindërit appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.