Trump dhe Xi diskutojnë stabilitetin SHBA-Kinë, tensionet për Tajvanin mbeten të mëdha

May 14, 2026 - 11:02
Trump dhe Xi diskutojnë stabilitetin SHBA-Kinë, tensionet për Tajvanin mbeten të mëdha

Trump dhe Xi diskutojnë stabilitetin SHBA-Kinë, tensionet për Tajvanin mbeten të mëdha

Presidenti amerikan Donald Trump dhe lideri kinez Xi Jinping kanë përfunduar më 14 maj në Pekin bisedimet e tyre të nivelit të lartë, të cilat zgjatën më shumë se dy orë. Të dyja palët kanë shprehur optimizëm për stabilizimin e raporteve ndërmjet SHBA-së dhe Kinës, megjithëse mosmarrëveshjet e mëdha për Tajvanin, tregtinë dhe luftën në Iran kanë dominuar diskutimet gjatë samitit.

Ky takim dypalësh paraqet bisedimet e para kokë më kokë mes Trumpit dhe Xisë që nga takimi i tyre në Korenë e Jugut në tetor të vitit 2025. Pas bisedimeve, Trump pritet të marrë pjesë në një banket shtetëror të organizuar në nder të tij, i cili do të vijë pas një vizite kulturore në Tempullin e Parajsës në Pekin.

Xi e ka shfrytëzuar hapjen e samitit për të bërë thirrje për bashkëpunim ndërmjet dy ekonomive më të mëdha në botë. Ai ka theksuar se Kina dhe Shtetet e Bashkuara duhet të jenë “partnerë dhe jo kundërshtarë”, pavarësisht nga rivaliteti strategjik në rritje dhe paqëndrueshmëria globale. Nga ana tjetër, Trump e ka quajtur Xinë “mik” dhe ka deklaruar se “raportet ndërmjet Kinës dhe SHBA-së do të jenë më të mira se kurrë më parë”.

Megjithatë, edhe pse të dy liderët kanë vënë në pah marrëdhënien e tyre personale dhe nevojën për bashkëpunim më të ngushtë, bisedimet kanë treguar se sa të brishta janë raportet ndërmjet dy vendeve. Mosmarrëveshjet lidhur me tregtinë, teknologjinë, Tajvanin dhe pasojat globale të luftës në Iran kanë mbetur të pazgjidhura.

“Trumpi kërkon stabilitet përpara zgjedhjeve të mesmandatit dhe në kohën kur SHBA-ja mbetet e përfshirë në konfliktin me Iranin”, ka thënë për Radion Evropa e Lirë Daniel Russel, bashkëpunëtor në Institutin për Politika Shoqërore në Azi dhe ish-ndihmëssekretar amerikan i Shtetit për Çështjet e Azisë Lindore dhe Paqësorit. “Pekini dëshiron një mjedis të jashtëm të qëndrueshëm, ndërsa përballet me presione ekonomike brenda vendit”.

Si Uashingtoni ashtu edhe Pekini duken më të përqendruar në menaxhimin e tensioneve dhe parandalimin e përshkallëzimit të mëtejshëm sesa në arritjen e një përparimi të madh diplomatik.

“Pavarësisht çdo deklarate, trajektorja afatgjatë mbetet rivalitet strategjik”, ka shtuar Russel. “Shumica e rezultateve do të jenë të kufizuara, transaksionale dhe potencialisht të kthyeshme”.

Paralajmërimet për Tajvanin dhe sinjalet për tregtinë

Tajvani ka qenë një nga pikat kryesore gjatë bisedimeve. Sipas një njoftimi të publikuar nga agjencia shtetërore kineze e lajmeve Xinhua, Xi e ka paralajmëruar Trumpin se menaxhimi i gabuar i kësaj çështjeje mund t’i shtyjë dy vendet drejt një konfrontimi të drejtpërdrejtë.

“Nëse menaxhohet si duhet, dy vendet mund të ruajnë stabilitetin”, ka thënë Xi, sipas njoftimit kinez për bisedimet. “Nëse menaxhohet keq, dy vendet do të përplasen ose madje do të hyjnë në konflikt, duke e vënë të gjithë marrëdhënien SHBA-Kinë në një situatë jashtëzakonisht të rrezikshme”.

Kina e konsideron ishullin vetëqeverisës Tajvan si pjesë të territorit të saj dhe është zotuar që do ta vë nën kontroll, qoftë edhe me forcë. Zyrtarët kinezë kanë ushtruar presion ndaj Uashingtonit që të zvogëlojë mbështetjen ushtarake dhe politike për Tajpein, veçanërisht në lidhje me shitjet e armëve amerikane për ishullin.

Administrata e Trumpit raportohet se ka shtyrë njoftimin ndaj Kongresit për një paketë të planifikuar armësh prej 13 miliardë dollarësh për Tajvanin para samitit, me qëllim që të shmangë rritjen e tensioneve me Pekinin. Gjatë një bisede telefonike në shkurt, Xi i kishte kërkuar Trumpit që ta trajtonte këtë çështje me “kujdes ekstrem”.

“Xi Jinping dëshiron disa lëshime ose disa garanci lidhur me Tajvanin dhe për atë se çfarë do të bënte Trumpi në rast se Kina do ta rrisë presionin ndaj ishullit”, ka thënë për Radion Evropa e Lirë Yvonne Chiu, bashkëpunëtore në Institutin American Enterprise. “Kjo lidhet po ashtu me një objektiv më të gjerë të Pekinit, që është kundërshtimi i SHBA-së në rajonin e Indo-Paqësorit”.

Tensionet tregtare dhe ekonomike kanë zënë gjithashtu një vend të rëndësishëm në bisedime, megjithëse sinjalet e para kanë treguar për përparim të kufizuar.

Kina ka miratuar licenca eksporti për disa qindra thertore amerikane, duke u mundësuar atyre rifillimin e dërgesave të mishit të viçit drejt Kinës, sipas të dhënave të publikuara nga Administrata e Përgjithshme e Doganave të Kinës. Licencat kishin skaduar në mars 2025, pasi presidenti Trump kishte vendosur një rund tarifash ndaj mallrave kineze.

Ky veprim përfaqëson një gjest modest të vullnetit të mirë përpara negociatave më të gjera mbi tarifat, kontrollin e eksporteve dhe zinxhirët e furnizimit. Trumpi ka vënë në pah tregtinë dhe investimet para samitit, ndërsa Pekini po kërkon lehtësime nga kontrollin amerikan mbi eksportin e teknologjisë së avancuar dhe garanci kundër tarifave të reja.

Gjatë takimit me Xinë, Trump ishte i shoqëruar nga disa drejtues të njohur biznesesh, përfshirë shefin ekzekutiv të Tesla, Elon Musk, shefin ekzekutiv të NVIDIA, Jensen Huang, dhe shefin ekzekutiv të Apple, Tim Cook.

Xi ka thënë delegacionit biznesor të SHBA-së se Kina “do të hapet më shumë” për botën, edhe pse nuk ka ofruar ndonjë zotim formal. “Dyert e Kinës ndaj botës së jashtme do të hapen gjithnjë e më shumë”, ka cituar të ketë thënë Xi gjatë samitit, sipas mediave shtetërore kineze. “Kompanitë amerikane do të kenë perspektiva edhe më të mëdha në Kinë”.

Mineralet e rralla tokësore kanë mbetur një pikë kyç ndikimi për Kinën në negociatat tregtare. Gjatë takimit të tyre në Korenë e Jugut vitin e kaluar, Trump dhe Xi u pajtuan që të ulnin tensionet lidhur me një mosmarrëveshje tregtare që po përshkallëzohej shpejt, pasi Pekini kërcënoi me kufizime të gjera mbi eksportet e mineraleve të rralla të tokës si kundërpërgjigje ndaj tarifave të larta amerikane.

Kina i ka shtyrë këto masa për një vit, dhe zgjatja e tyre mbetet një nga çështjet kryesore gjatë samitit. Grupi prej 17 mineralesh, thelbësore për produkte që variojnë nga telefonat e mençur deri tek aeroplanët luftarakë, është kthyer në një instrument të rëndësishëm negociues për Kinën, ndërsa konkurrenca për teknologjitë e avancuara dhe zinxhirët globalë të furnizimit po intensifikohet. Kina dominon një pjesë të madhe të kapacitetit botëror të nxjerrjes dhe përpunimit të këtyre materialeve të rralla.

Lufta në Iran rrit presionin ndaj bisedimeve

Lufta në Iran dhe ndërprerjet e shkaktuara në transportin detar përmes Ngushticës së Hormuzit kanë lënë në hije takimet në Pekin. Trumpi pritet të ushtrojë presion mbi Xinë që Kina të përdorë lidhjet e saj të ngushta me Teheranin për ta inkurajuar Iranin të pranojë një marrëveshje më të gjerë paqeje dhe të lehtësojë kufizimet që ndikojnë në trafikun detar përmes Ngushticës së Hormuzit, që është një pikë strategjike përmes së cilës kalon rreth një e pesta e naftës globale.

Megjithatë, para nisjes nga Uashingtoni, Trumpi i ka minimizuar sugjerimet se Shtetet e Bashkuara kishin nevojë për ndihmën e Pekinit për ta zgjidhur konfliktin. “Nuk mendoj se na duhet ndonjë ndihmë për Iranin”, ka thënë Trump gazetarëve në Shtëpinë e Bardhë më 12 maj. “Ne do të fitojmë në një mënyrë ose në një tjetër, në mënyrë paqësore ose në një mënyrë tjetër”.

Sekretari amerikan i Shtetit, Marco Rubio, i ka thënë Fox News gjatë udhëtimit drejt Kinës se SHBA-ja ia ka paraqitur Pekinit argumentin pse duhet të marrë një rol më “aktiv” në zgjidhjen e konfliktit në Iran. “Ne ua kemi paraqitur argumentin kinezëve, dhe shpresoj që të jetë bindës dhe ata do të kenë një mundësi të bëjnë diçka për këtë në Kombet e Bashkuara më vonë këtë javë”, ka thënë Rubio.

Raportet e Kinës me Teheranin i japin Xisë potencial për të nxjerrë lëshime në një moment kur ndërprerjet në energji dhe rritja e çmimeve të karburanteve po rëndojnë ekonominë globale dhe po shtojnë presion politik mbi Shtëpinë e Bardhë. Pekini ka mbajtur lidhje të ngushta ekonomike me Iranin gjatë gjithë konfliktit dhe mbetet një nga blerësit më të mëdhenj të naftës iraniane.

Një sinjal se Pekini dhe Uashingtoni po kërkonin terren të përbashkët, zyrtarë të lartë amerikanë dhe kinezë kanë thënë se asnjë vend nuk duhet të lejohet të vendosë “tarifë” për lundrim nëpër Ngushticën e Hormuzit, sipas një njoftimi të lëshuar nga Departamenti i Shtetit amerikan para se Trump të nisej për në samitin në Pekin.

Teherani ka kërkuar që të ketë të drejtë të vendosë tarifa për trafikun detar si parakusht për përfundimin e luftës. Shtetet e Bashkuara kanë vendosur një bllokadë detare ndaj Iranit, ndërsa Trumpi ka lënë të hapur mundësinë e vendosjes së tarifave për trafikun detar ose bashkëpunimin me Iranin për mbledhjen e tarifave.

“Do të ketë shumë biseda prapa skenave për Iranin”, ka thënë Chiu. “Por, nuk pres që të jenë publike, pjesërisht sepse kjo sjell rrezik për reputacionin e Kinës nëse këto përpjekje dështojnë”.

Me pak fjalë

Samiti ndërmjet Trumpit dhe Xisë ka treguar se, edhe pse të dyja palët kanë shprehur dëshirë për stabilitet dhe bashkëpunim, tensionet për Tajvanin, tregtinë dhe luftën në Iran mbeten të mëdha. Përparimet janë të kufizuara, ndërsa rivaliteti strategjik vazhdon të jetë një pengesë e madhe për marrëdhëniet ndërmjet SHBA-së dhe Kinës.

Personat e përmendur


Burimi i lajmit: infoshqip.com
Shënim: Ky material është përpunuar për qëllime informimi nga Portali Kosova.Today.