Vesa hap arkivat nga fëmijëria, emocionon me mesazhin ndaj vetes

Vesa Luma, ka bërë një udhëtim emocionues pas në kohë, duke ndarë me ndjekësit e saj në Instagram fotografi të rralla nga fëmijëria e saj.

Bashkangjitur këtij imazhi, ajo ka bërë një dedikim tejet të ndjerë dhe frymëzues dedikuar “Vesës së vogël”.

Ajo reflekton mbi sfidat e jetës, nga mbijetesa gjatë luftës e deri te realizimi i ëndrrave dhe krijimi i familjes që ka sot.

“Të kisha ditur të të them atëherë që do t’i ndjekësh dhe realizosh ëndrrat e tua, do krijosh një familje më të mirë se që e ke paramenduar, do t’i mbijetosh luftërave, sfidave me shumicë, dhe prapë do kesh energji të nisësh nga e para si një ‘Dem’ i vërtetë, i çuditshëm, i palexueshëm… por mbrojtëse ndaj çdo gjëje që dua në këtë jetë,” – ka shkruar Vesa krahas fotos.

Këngëtarja ka zbuluar me humor se shkas për këtë postim është bërë pikërisht djali i saj, Liani. Ai mesa duket ngacmon shpesh prindërit duke u thënë se “nuk dinë asgjë pasi i përkasin epokës së dinosaurëve”. Kjo e ka bërë Vesën të reagojë me shaka duke i treguar se sa shumë gjëra ka kaluar dhe mësuar brezi i saj.

Ajo që bie më shumë në sy dhe që është theksuar nëpër komente është ngjashmëria e frikshme – “si dy pika uji” – që Vesa e vogël ka me djalin e saj, Lianin.