Uji i ndotur në Turbenthal, banorëve u kërkohet ta vlojnë para përdorimit

Banorët e pesë zonave të komunës Turbenthal, në kantonin e Cyrihut, duhet ta vlojnë ujin e rubinetit para përdorimit, pas zbulimit të një ndotjeje mikrobiologjike, përcjell albinfo.ch.

Sipas njoftimit të komunës, masa prek Turbenthal Dorf, Oberhofen, Neubrunn, Seelmatten dhe Ramsberg. Ndotja u konstatua më 12 nëntor.

Uji duhet të vlojë vrullshëm para se të përdoret për pirje, gatim, larjen e dhëmbëve, përgatitjen e pijeve dhe larjen e frutave e perimeve. Për pirje dhe përgatitjen e ushqimit të foshnjave rekomandohet ujë i ambalazhuar.

Në përditësimin e 13 nëntorit, komuna njoftoi se ka nisur dezinfektimin e rrjetit me klor, në koordinim me laboratorin kantonal. Kjo mund t’i japë ujit përkohësisht një erë ose shije të lehtë klori.

Megjithatë, detyrimi për vlimin e ujit mbetet në fuqi. Ai do të hiqet vetëm kur analizat e mëtejshme të konfirmojnë se ndotja është eliminuar.

Për dush, larjen e rrobave dhe shpëlarjen e tualetit nuk kërkohet vlimi i ujit./Albinfo.ch

The post Uji i ndotur në Turbenthal, banorëve u kërkohet ta vlojnë para përdorimit appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.