BE: Nuk ndryshojnë obligimet e Serbisë nga dialogu me Kosovën

Bashkimi Evropian ka porositur qeverinë e ardhshme të Serbisë, që do të dalë pas zgjedhjeve, se nga ajo pritet sjellje konstruktive në dialogun për normalizimin e raporteve me Kosovën, përfshirë edhe zbatimin e të gjitha marrëveshjeve të arritura deri më tash.

Këtë e ka thënë një zëdhënës i BE-së, duke u shprehur se rezultati i zgjedhjeve të fundit në Serbi nuk ndryshon themelet apo obligimet nga dialogu i lehtësuar nga BE-ja.

“Dialogu i lehtësuar nga BE-ja nuk varet nga udhëheqësit politikë individualë. Të gjitha obligimet ekzistuese mbeten valide, përfshirë Marrëveshjen e vitit 2023 për rrugën drejt normalizimit dhe aneksin e implementimit (Marrëveshjen e Ohrit)”, ka thënë ky zëdhënës.

Ky zëdhënës ka thënë se në këtë moment është tepër herët për të spekuluar rreth ndryshimeve të mundshme të pozicionit të Serbisë në dialog dhe implikimeve të tyre në këtë proces.

“Ne presim nga Serbia që të vazhdojë të angazhohet në mënyrë konstruktive, të respektojë obligimet ekzistuese dhe të kontribuojë në procesin drejt normalizimit. BE-ja mbetet e gatshme të angazhohet me lidershipin e ri për të mbajtur momentumin e këtij procesi”, ka thënë ky zëdhënës.

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.