Përplasja BDI–VLEN për gjuhën shqipe: Hoxha akuzon, VLEN kundërpërgjigjet me kritika ndaj Ahmetit

Përplasja politike mes BDI-së dhe VLEN-it për përdorimin zyrtar të gjuhës shqipe është intensifikuar pas reagimit të nënkryetarit të BDI-së, Arianit Hoxha, i cili akuzoi institucionet shtetërore për mosrespektim të Ligjit për Përdorimin e Gjuhëve.

Hoxha tha se mosrespektimi i ligjit po shndërrohet në një “trend shqetësues” në institucionet shtetërore të Maqedonisë së Veriut.

Sipas tij, drejtues të institucioneve po marrin kompetenca që, siç pretendon ai, nuk u takojnë, duke vendosur në mënyrë individuale për përdorimin e gjuhës shqipe në komunikimin zyrtar.

Në reagimin e tij, Hoxha përmendi edhe Institutin e Shëndetit Publik, duke pretenduar se drejtoresha Marija Andonovska ka udhëzuar sektorët që komunikimi zyrtar të zhvillohet vetëm në gjuhën maqedonase.

“Sipas informacioneve që disponojmë, drejtuesit e sektorëve janë udhëzuar t’i njoftojnë punonjësit, përmes mesazheve telefonike, se dokumentet dygjuhëshe nuk do të pranohen më dhe se të vlefshme do të konsiderohen vetëm dokumentet vetëm në gjuhën maqedonase”, deklaroi Hoxha.

Ai kërkoi përgjegjësi për atë që e konsideron shkelje të Ligjit për Përdorimin e Gjuhëve, ndërsa kritikoi edhe përfaqësuesit e VLEN-it.

“Me çfarë të drejte një drejtoreshë e një institucioni shtetëror merr guximin të shpallë të pavlefshme dokumentet që përmbajnë gjuhën shqipe? Kush ia ka dhënë kompetencën të vendoset mbi ligjin?”, pyeti Hoxha.

Ai akuzoi VLEN-in se nuk po reagon ndaj, siç tha, shkeljeve të ligjit dhe se përfaqësuesit e këtij koalicioni nuk po arrijnë ta mbrojnë përdorimin e gjuhës shqipe.

VLEN: Hoxha të pyesë fillimisht Ali Ahmetin
Nga VLEN-i reaguan duke e kthyer vëmendjen te periudha e qeverisjes së BDI-së dhe vendimet e saj të mëparshme lidhur me statusin e gjuhës shqipe.

Në kundërpërgjigjen e tyre, nga VLEN-i thanë se Hoxha, para se të kërkojë llogari për zbatimin e Ligjit për Përdorimin e Gjuhëve, duhet t’i kërkojë përgjigje kryetarit të BDI-së, Ali Ahmeti.

“Para se të kërkojë llogari për Ligjin për përdorimin e gjuhëve, bën mirë ta pyesë kryetarin e tij për disa çështje”, thuhet në reagimin e VLEN-it.

VLEN-i përmendi deklaratën e Gëzim Ostrenit, të cilin e cilëson si një nga figurat kryesore të vitit 2001, duke pretenduar se Ali Ahmeti kishte pranuar që gjuha shqipe të mos përmendej me emër në Kushtetutë, por të mbetej me formulimin “20 përqindëshi”.

Po ashtu, VLEN-i ngriti pyetje lidhur me iniciativat para Gjykatës Kushtetuese gjatë periudhës 2019–2024, duke pretenduar se BDI-ja kishte mundësi të ndikonte në këtë proces përmes Sali Muratit, i cili në atë periudhë ishte kryetar i Gjykatës Kushtetuese dhe aktualisht është deputet i BDI-së.

Në reagimin e tyre, nga VLEN-i përmendën edhe vitin 2004 dhe qeverisjen e atëhershme të BDI-së me LSDM-në, duke pretenduar se në Këshillin e Evropës ishte pranuar që termi “minoritet” të zbatohej edhe për shqiptarët.

VLEN: Pushteti i BDI-së ishte “farsë politike”
VLEN-i e ashpërsoi edhe më tej tonin ndaj BDI-së, duke e akuzuar për keqpërdorim politik të çështjeve që lidhen me të drejtat e shqiptarëve.

“Gjithë shqiptarët e dinë se pushteti i BDI-së ka qenë farsë e madhe. Mashtrim politik që keqpërdori sakrificën e një populli për t’i bërë milionerë disa funksionarë të përjetshëm, me dy banka në xhep”, thuhet në reagimin e VLEN-it.

Kështu, debati për zbatimin e gjuhës shqipe është shndërruar në një përplasje të drejtpërdrejtë politike mes BDI-së dhe VLEN-it, ku të dyja palët akuzojnë njëra-tjetrën për përgjegjësi lidhur me statusin dhe përdorimin institucional të gjuhës shqipe.

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.