Valisi, kantoni i Zvicrës ku dërgohen pakot më të mëdha dhe më të rënda

Një analizë e Postës Zvicerane, e bazuar në 620 milionë dërgesa gjatë periudhës 2022–2026, zbulon dallime interesante mes kantoneve. Ndërkohë, gjatë muajit dhjetor, pakot bëhen mesatarisht më të lehta dhe më të vogla.

Kantoni i Valisit kryeson në Zvicër për nga madhësia dhe pesha e pakove që pranohen nga Posta Zvicerane. Këtë e tregon një analizë e publikuar nga kompania postare, e cila ka shqyrtuar 620 milionë dërgesa të realizuara gjatë periudhës 2022–2026.

Sipas të dhënave, pakot e dërguara në Valis peshojnë mesatarisht 3.53 kilogramë. Kjo është rreth një e treta më shumë sesa në kantonin Schaffhausen, ku pesha mesatare arrin në 2.66 kilogramë.

Valisi kryeson edhe për nga madhësia e dërgesave. Pakot që pranohen në këtë kanton janë mesatarisht rreth 56 për qind më të mëdha sesa ato në kantonin Neuchâtel.

Dallime edhe në mënyrën e pranimit të pakove

Analiza e Postës Zvicerane evidenton gjithashtu dallime rajonale në mënyrën se si qytetarët preferojnë t’i pranojnë dërgesat.

Në të gjitha 26 kantonet, autorizimi për lënien e pakos në një vend të caktuar, pa qenë e nevojshme prania e marrësit, është opsioni më i shpeshtë. Kjo praktikë regjistrohet në 20 për qind të dërgesave në kantonin Uri, ndërsa në Gjenevë përbën vetëm 3.9 për qind.

Nga ana tjetër, ndalimi i shprehur për dorëzimin e pakove arrin në 5.1 për qind në Basel-Stadt, krahasuar me vetëm 0.55 për qind në Uri.

Në kantonin Fribourg është më e zakonshme që pakot t’u dorëzohen fqinjëve. Kjo mënyrë shpërndarjeje regjistrohet në 3.14 nga çdo 1.000 dërgesa, ndërsa në Appenzell Innerrhoden shifra është 0.68 për 1.000 dërgesa.

Gjeneva veçohet për një praktikë tjetër: udhëzimet për lënien e pakove në një kat të caktuar të ndërtesës. Këto përbëjnë 34 për qind të udhëzimeve të përhershme për dorëzim. Në Gjenevë, udhëzime të tilla regjistrohen në rreth 9 nga çdo 1.000 dërgesa, ndërsa në kantonin Vaud, që renditet i dyti, në afro 3 nga 1.000.

Pakot bëhen më të lehta dhe më të vogla në dhjetor

Një tjetër rezultat interesant i analizës lidhet me periudhën e festave të fundvitit.

Pavarësisht rritjes së aktivitetit postar gjatë sezonit të Krishtlindjeve, pakot bëhen mesatarisht më të lehta dhe më të vogla.

Nga nëntori në dhjetor të vitit 2025, pesha mesatare e pakove ra nga 2.92 në 2.62 kilogramë, që përfaqëson një ulje prej më shumë se 10 për qind. Edhe madhësia mesatare e dërgesave shënoi rënie.

Sipas Postës Zvicerane, ky fenomen është vërejtur në të gjitha vitet e përfshira në analizë.

The post Valisi, kantoni i Zvicrës ku dërgohen pakot më të mëdha dhe më të rënda appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.