Sondazhi: 58 për qind mbështesin trenin direkt mes Zvicrës dhe Londrës

Krijimi i një lidhjeje të drejtpërdrejtë hekurudhore mes Zvicrës dhe Londrës gëzon mbështetje të gjerë. Sipas një sondazhi të institutit YouGov, 58 për qind e të anketuarve janë në favor të kësaj lidhjeje, ndërsa vetëm 8 për qind e kundërshtojnë.

Sondazhi u realizua me 1.048 të rritur, nga 11 deri më 24 shtator 2026, me porosi të organizatave Transport & Environment (T&E), actif-trafiC dhe Shoqatës për Transport dhe Mjedis (ATE). Rezultatet janë ponderuar për të përfaqësuar popullsinë e rritur të Zvicrës, shkruan swissinfo.ch, transmeton albinfo.ch.

Çmimi dhe kohëzgjatja e udhëtimit mbeten pengesat kryesore për zgjedhjen e trenit. Ndër personat që do të zgjidhnin aeroplanin për të udhëtuar drejt Mbretërisë së Bashkuar, 79 për qind përmendin shpejtësinë. Bileta më të lira do të nxisnin 61 për qind të konsideronin trenin, ndërsa lidhjet direkte dhe udhëtimet më të shkurtra përmenden secila nga 37 për qind.

Sipas Victor Thévenet nga T&E, shmangia e ndërrimit të trenit në Paris mund ta ulte udhëtimin Gjenevë–Londër nga më shumë se shtatë orë në rreth pesë orë e gjysmë. Organizatat kërkojnë investime në stacione dhe tarifa të përballueshme, që hekurudha të mund të konkurrojë më mirë me transportin ajror.

Hekurudhat Federale të Zvicrës (SBB), kompania franceze SNCF dhe Eurostar kanë nënshkruar një memorandum mirëkuptimi për zhvillimin e lidhjes. Megjithatë, mbeten pengesa për t’u zgjidhur dhe shërbimi nuk pritet të realizohet para viteve 2030.

The post Sondazhi: 58 për qind mbështesin trenin direkt mes Zvicrës dhe Londrës appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.