16 vjeçari shqiptar humb jetën gjatë një ndeshje futbolli në Greqi

Në një atmosferë të rëndë zie, familjarë, miq dhe shokë skuadre i dhanë lamtumirën e fundit 16-vjeçarit shqiptar Asllan Gjana, i cili humbi jetën pasi u dëmtua gjatë një ndeshjeje futbolli në stadiumin e Panagias, në ishullin grek të Thasos.

Ngjarja tragjike ndodhi të dielën e kaluar, vetëm në minutat e para të ndeshjes. Sipas të dhënave paraprake, 16-vjeçari ishte përfshirë në një duel për topin pranë vijës anësore, kur humbi ekuilibrin dhe u rrëzua, duke përplasur pjesën e pasme të kokës në rrethimin e fushës.

Pas goditjes, i riu humbi ndjenjat dhe u transportua në repartin e terapisë intensive të spitalit të Kavallës. Pavarësisht përpjekjeve të mjekëve, ai ndërroi jetë mëngjesin e së martës, më 29 shtator.

Hetim për rrethanat e vdekjes

Përveç mënyrës se si ndodhi dëmtimi, hetimet janë përqendruar edhe te përshtatshmëria dhe kushtet e sigurisë së stadiumit ku zhvillohej ndeshja.

Policia e Thasos, në koordinim me Prokurorinë e Kavallës, po verifikon nëse fusha plotësonte standardet e përcaktuara të sigurisë dhe nëse kishte të gjitha masat e nevojshme mbrojtëse për zhvillimin e ndeshjeve.

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.