Lara Colturi shkëlqen në Austri, vetëm një të qindtën e sekondës larg fitores në Kupën e Botës

Lara Colturi e ka nisur me një rezultat të shkëlqyer sezonin e ri të Kupës së Botës në skitë alpine, duke u renditur e dyta në disiplinën e sllallomit gjigant në Sölden të Austrisë, përcjell albinfo.ch.

Në garën e zhvilluar të shtunën, më 24 tetor, skiatorja që përfaqëson Shqipërinë regjistroi kohën e përgjithshme prej 2 minutash, 14 sekondash e 83 të qindtash, duke mbetur vetëm 0.01 sekonda pas fitueses amerikane Paula Moltzan.

Në lëshimin e parë, Colturi u rendit në vendin e gjashtë, me kohën 1 minutë, 8 sekonda e 5 të qindta. Megjithatë, në lëshimin e dytë ajo arriti të përmirësonte ndjeshëm paraqitjen, duke regjistruar kohën 1 minutë, 6 sekonda e 78 të qindta dhe duke siguruar një vend në podium.

Fituesja e garës, Paula Moltzan, e përfundoi konkurrimin me kohën 2 minuta, 14 sekonda e 82 të qindta, duke shënuar fitoren e parë në karrierën e saj në Kupën e Botës.

Në vendin e tretë u rendit gjermania Emma Aicher, me 0.52 sekonda diferencë nga fituesja, ndërsa suedezja Sara Hector përfundoi e katërta.

Gara u zhvillua në kushte të vështira atmosferike, me reshje bore dhe dukshmëri të kufizuar, të cilat ndikuan në paraqitjen e disa prej sportisteve.

Ndërkohë, amerikania Mikaela Shiffrin, e cila kryesonte pas lëshimit të parë, nuk arriti ta ruante avantazhin dhe përfundoi në vendin e shtatë.

Për Lara Colturin, ky rezultat shënon një fillim të suksesshëm të sezonit të ri, duke e renditur që në garën e parë mes sportisteve më të mira të skijimit alpin.

Me vendin e dytë në Sölden, Colturi siguron edhe 80 pikët e para në renditjen e përgjithshme të Kupës së Botës për sezonin 2026/2027./Albinfo.ch

The post Lara Colturi shkëlqen në Austri, vetëm një të qindtën e sekondës larg fitores në Kupën e Botës appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.