Si funksiononte grupi i kok’ainës: Nga furnizimi te shitja me vetura me qira, roli i Haraqijës dhe të dyshuarve tjerë
Një grup i dyshuar për trafikim dhe shitje të kokainës në Prishtinë kishte ndarë rolet ndërmjet anëtarëve të tij, nga sigurimi i narkotikëve deri te shpërndarja në doza të vogla dhe mbledhja e parave. Sipas dosjes së Prokurorisë, Jeton Stanovci dyshohet se ishte drejtuesi i grupit, ndërsa ish-ministri Astrit Haraqija përmendet si njëri prej furnizuesve të dyshuar me kokainë.
Këto hollësi dalin nga kërkesa e Prokurorisë Themelore në Prishtinë për caktimin e paraburgimit ndaj ish-ministrit Astrit Haraqija dhe pesë personave të tjerë, të cilën e ka siguruar dhe publikuar “Betimi për Drejtësi”.
Në dokumentin e Prokurorisë përmenden gjithsej nëntë persona, të cilët dyshohen se, në bashkëpunim me persona të tjerë ende të paidentifikuar, kanë vepruar në zona të ndryshme të Prishtinës, me qëllim përfitimin financiar nga shitja e kokainës.
Jeton Stanovci, drejtues i grupit
Sipas Prokurorisë, Jeton Stanovci ishte kryesuesi i grupit dhe personi që organizonte furnizimin me narkotikë.
Ai dyshohet se siguronte kokainën nga Mërgim Stanovci, Astrit Haraqija dhe Alban Maloku.
Pas furnizimit, narkotikët ndaheshin në sasi të vogla, të cilat më pas i dorëzoheshin Gëzim Fekës për shpërndarje dhe shitje.
Astrit Haraqija, furnizues, takimet në objektin ku banonte
Ish-ministri i Kulturës, Astrit Haraqija, përmendet nga Prokuroria si njëri prej personave që dyshohet se furnizonte grupin me kokainë.
Sipas kërkesës për paraburgim, nga masat e veçanta hetimore dyshohet se Jeton Stanovci, Mërgim Stanovci dhe Astrit Haraqija zhvillonin takime në objektin banesor ku jetonte ish-ministri.
Prokuroria pretendon se në këtë objekt përgatitej substanca narkotike që sillte Mërgim Stanovci.
Aty, sipas dyshimeve, kokaina ndahej në sasi më të vogla, për t’iu dorëzuar më pas Gëzim Fekës për shpërndarje dhe shitje.
Haraqija dyshohet gjithashtu për posedim të paautorizuar të armës, pasi gjatë bastisjes së banesës së tij Policia sekuestroi një pistoletë me karikator dhe gjashtë fishekë.
Në banesë u sekuestruan edhe para dhe dy telefona iPhone.
Mbrojtësi i Haraqijës, avokati Korab Bokshi, ka mohuar përfshirjen e klientit të tij në aktivitetin e dyshuar kriminal.
Ai ka deklaruar se Haraqija, si figurë publike, mund të ketë pasur takime apo komunikime me persona të ndryshëm, por jo lidhur me trafikimin e narkotikëve.
Avokati ka thënë gjithashtu se paratë e sekuestruara ishin kursime të fëmijëve të Haraqijës.
Mërgim Stanovci, sigurimi i kokainës
Mërgim Stanovci, i cili sipas Prokurorisë ndodhet në arrati, dyshohet se ishte njëri prej furnizuesve të grupit.
Sipas dokumentit, ai dyshohet se sillte substancën narkotike, e cila më pas përgatitej dhe ndahej në doza më të vogla gjatë takimeve me anëtarë të tjerë.
Alban Maloku, furnizuesi tjetër i dyshuar
Edhe Alban Maloku përmendet si njëri nga furnizuesit e dyshuar me narkotikë.
Sipas Prokurorisë, Jeton Stanovci siguronte kokainë edhe prej tij, përpara se substanca të kalonte te personat përgjegjës për shpërndarjen.
Gëzim Feka, pranimi dhe shpërndarja e kokainës
Sipas dosjes, Gëzim Feka dyshohet se kishte rol qendror në shpërndarjen e narkotikëve.
Ai pranonte kokainën e ndarë në sasi më të vogla, mbante një pjesë për vete dhe pjesën tjetër ua dorëzonte Arjanit Beqirit dhe Albert Krasniqit.
Këta dy të fundit dyshohet se e shpërndanin më pas substancën te blerësit.
Arjanit Beqiri dhe Albert Krasniqi, shitja e kokainës me vetura me qira
Prokuroria pretendon se Arjanit Beqiri dhe Albert Krasniqi merreshin me shpërndarjen dhe shitjen e kokainës në doza të vogla.
Një hollësi e përmendur në kërkesën për paraburgim është se shpërndarja dyshohet se bëhej përmes veturave të marra me qira.
Të dy dyshohet se pranonin narkotikët nga Gëzim Feka, për t’i shitur më pas te persona të tjerë.
Baftije Feka, ruajtja e kokainës dhe parave
Sipas Prokurorisë, Baftije Feka, bashkëshortja e Gëzim Fekës, dyshohet se kishte për detyrë ruajtjen e sasive të narkotikëve që shiteshin nga bashkëshorti i saj.
Ajo dyshohet se mbante gjithashtu paratë e siguruara nga shitjet.
Albana Xhemajli-Ramadani, mbledhja e parave dhe llogaritë javore
Albana Xhemajli-Ramadani, bashkëjetuese e Jeton Stanovcit, dyshohet se kishte rol në mbledhjen e parave nga shitja e narkotikëve.
Sipas dosjes, ajo mblidhte pagesat nga Gëzim Feka, Arjanit Beqiri dhe Albert Krasniqi.
Prokuroria pretendon se barazimi i llogarive bëhej kryesisht çdo të diel, kur përllogariteshin paratë për sasitë e shitura dhe të shpërndara.
Po ashtu, në këtë fazë organizohej furnizimi me sasi të reja të kokainës për shpërndarjen gjatë javës pasuese.
Hetimet nisën muaj më parë, Haraqija u përfshi në fazën e fundit
Sipas Prokurorisë, hetimet fillimisht u zhvilluan ndaj Jeton Stanovcit, Gëzim Fekës, Arjanit Beqirit dhe personave ende të paidentifikuar.
Pas autorizimit të masave të veçanta hetimore, u identifikuan edhe Albana Xhemajli-Ramadani dhe Baftije Feka.
Më 22 maj 2026 u mor vendim për përshtatjen e hetimeve edhe ndaj tyre, ndërsa më 27 korrik hetimet u zgjeruan ndaj Albert Krasniqit dhe Mërgim Stanovcit.
Astrit Haraqija dhe Alban Maloku u përfshinë në vendimin për zgjerimin e hetimeve më 15 nëntor, një ditë pas nisjes së operacionit policor.
Operacioni “Heshtja”, gjashtë të arrestuar dhe mbi 300 mijë euro asete të sekuestruara
Operacioni policor i koduar “Heshtja” u zhvillua më 14 nëntor në rajonin e Prishtinës.
Ai u realizua nga Drejtoria për Hetimin e Trafikimit me Narkotikë, në bashkëpunim me Agjencinë e Kosovës për Inteligjencë.
Sipas Policisë së Kosovës, gjatë operacionit u arrestuan gjashtë persona dhe u sekuestruan substanca narkotike dhe asete të tjera me vlerë mbi 300 mijë euro.
Prokuroria ka kërkuar caktimin e paraburgimit, duke argumentuar se ekziston rreziku i arratisjes së të pandehurve, ndikimit në dëshmitarë, asgjësimit të provave dhe përsëritjes së veprave penale.
Në kërkesën e nënshkruar nga prokurori Arben Hoti, thuhet se masat alternative nuk do të ishin të mjaftueshme për sigurimin e pranisë së të pandehurve në procedurë.
Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.