IGLI TARE ZBULON TË VËRTETAT E MILANIT: “Kisha nevojë për mbështetje, por nuk e gjeta atë që prisja”

Ish-drejtori sportiv i Milanit, Igli Tare, ka folur hapur për periudhën e tij në klubin kuqezi, duke zbuluar pakënaqësitë, vështirësitë dhe arsyet që, sipas tij, ndikuan në përfundimin e aventurës në “San Siro”.

Në një intervistë për emisionin “Calcio Unplugged” në Sky Sport, në bisedën me Gianluca Di Marzio dhe Stefano Borghi, Tare ka rrëfyer për herë të parë pas disa muajsh heshtjeje se zhgënjimi për mosarritjen e Ligës së Kampionëve mbetet ende shumë i madh.

“Plaga e mosarritjes së Ligës së Kampionëve është ende e madhe. Që nga momenti kur mbërrita te Milani, objektivi nuk mund të ishte vetëm kualifikimi në Champions League. Përndryshe, nuk do ta kisha kuptuar plotësisht se ku po vija”, deklaroi Tare, transmeton ORAinfo.

Tare: Klubit duhej t’i jepej më shumë kohë

Duke folur për ndryshimet e mëdha në strukturën e klubit gjatë verës, drejtuesi shqiptar theksoi se një nga zhgënjimet më të mëdha ishte pamundësia për t’i bindur drejtuesit se një projekt sportiv kërkon kohë.

“Zhgënjimi im vjen nga fakti se nuk arrita t’i bëja përgjegjësit e klubit të kuptonin se njerëzve duhet t’u jepet kohë, ashtu siç po bëjnë tani. Sot flitet se duhen disa sesione të merkatos për të ndërtuar një skuadër konkurruese”, u shpreh ai.

Tare kujtoi se pas humbjes në finalen e Kupës së Italisë, kishte marrë përgjegjësinë për të riorganizuar skuadrën.

“Në merkato shitëm shumë lojtarë dhe afruam dhjetë të tjerë. Synimi ishte të krijonim një grup të bashkuar dhe me uri për sukses. Deri në muajt mars-prill ishim gjithmonë në vendin e parë ose të dytë, por më pas pësuam një rënie psikologjike për shkak të faktorëve të ndryshëm, përfshirë edhe disa faktorë të jashtëm për të cilët nuk dua të flas”, tha Tare.

“Do të kisha kërkuar një takim me të gjithë”

Ish-drejtori sportiv pranoi se edhe ai dhe trajneri Massimiliano Allegri mund të kishin bërë më shumë për ta mbajtur skuadrën në rrugën e duhur.

“Unë dhe Max duhej t’u kushtonim më shumë vëmendje disa faktorëve dhe të ishim më të pranishëm pranë skuadrës, për ta udhëhequr drejt rezultateve. Do të kisha kërkuar një takim të përbashkët, ku të gjithë të uleshim dhe të analizonim situatën. Pastaj mund të na largonin përsëri, por të paktën do të kishim diskutuar”, deklaroi ai.

Megjithatë, Tare theksoi se e respekton vendimin e klubit, pavarësisht zhgënjimit të madh.

“E respektoj zgjedhjen që është bërë dhe e pranoj. Nuk do të polemizoj, sepse dikush mbi ne ka vendosur fatin e klubit. E di që gjërat mund të kishin shkuar më mirë, por unë do të mbetem gjithmonë tifoz i Milanit”, u shpreh shqiptari.

Cardinale dhe mungesa e komunikimit

Një nga temat më interesante të intervistës ishte marrëdhënia me pronarin e Milanit, Gerry Cardinale.

Tare zbuloi se kishte dëshiruar një komunikim më të drejtpërdrejtë me të, pasi mendonte se kjo do të ndihmonte në marrjen e vendimeve të rëndësishme.

“Pas përfundimit të negociatave për Jasharin, u kënaqa shumë kur mora një telefonatë prej tij. I shpjegova të gjitha dinamikat e negociatave dhe ai u tregua i gatshëm, duke më thënë se mund të flisja me të për çdo gjë”, rrëfeu Tare.

Megjithatë, kjo mundësi nuk u shfrytëzua asnjëherë.

“Nuk pata kurrë mundësinë të flisja me të, sepse kishte njerëz mbi mua, të cilët nuk dëshiroja t’i anashkaloja. Një diskutim i tillë do të kishte qenë i dobishëm për të gjithë. Do të kisha preferuar që Cardinale të ishte më pranë meje, sepse kjo do të më kishte ndihmuar shumë. Por më mirë vonë sesa kurrë”, shtoi ai.

Xhelozi brenda drejtuesve të Milanit?

Në fund, Tare foli edhe për atmosferën brenda strukturës drejtuese të klubit, duke lënë të kuptohet se emërimi i tij dhe i Allegrit nuk ishte pritur njësoj nga të gjithë.

“Fillimisht flitej për dy figura të fuqishme si Tare dhe Allegri. Të dy vinin pas një sezoni të dobët të Milanit, ndaj kishte njëfarë zhgënjimi dhe unë e kuptoja këtë. Megjithatë, pak mund të bëja për këtë situatë. Për mua ishte thelbësore të punohej mirë dhe si një ekip i vetëm, në mënyrë që të paraqiteshim si një klub i vërtetë”, përfundoi ish-drejtuesi shqiptar.

Deklaratat e Igli Tares hedhin më shumë dritë mbi prapaskenat e qëndrimit të tij te Milani, duke evidentuar problemet e komunikimit, mungesën e kohës për projektin sportiv dhe vështirësitë në krijimin e një strukture të bashkuar drejtuese. /ORAinfo/

Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.