Arrestohen dy persona pas zjarrit në qendrën federale të azilit në Cyrih

Dy persona janë arrestuar pas një zjarri që shpërtheu të hënën pasdite në një dhomë të Qendrës Federale të Azilit në lagjen Kreis 5 të Cyrihut, njofton Policia e Qytetit të Cyrihut, përcjell albinfo.ch.

Alarmi për zjarrin u dha pak pas orës 16:30, ndërsa ekipet e emergjencës evakuuan të gjithë objektin. Zjarri u vu shpejt nën kontroll dhe u parandalua përhapja e mëtejshme e tij. Megjithatë, për shkak të tymit të dendur, ekipet e zjarrfikësve vazhduan punën për shuarjen përfundimtare dhe largimin e tymit deri pak para mesnatës.

Katër persona u dërguan në spital për kontroll dhe trajtim mjekësor, për shkak të dyshimit për helmim nga tymi. Bëhet fjalë për një banor të qendrës dhe tre punonjës të saj. Të gjithë u liruan nga spitali gjatë natës.

Arrestohen dy shtetas të huaj

Sipas të dhënave të para të hetimeve, zjarri ka shpërthyer në një dhomë gjumi. Policia nuk e përjashton mundësinë që bëhet fjalë për zjarrvënie të qëllimshme.

Në lidhje me rastin, Policia e Qytetit të Cyrihut ka arrestuar një 22-vjeçar nga Tunizia dhe një 24-vjeçar nga Algjeria. Ky i fundit ishte në mesin e personave që u dërguan në spital pas incidentit.

Pas përfundimit të punimeve të emergjencës, një pjesë e banorëve kanë mundur të kthehen në qendrën e azilit. Për rreth 160 persona të tjerë është dashur të sigurohet akomodim alternativ.

Hetimet për zbardhjen e plotë të rrethanave dhe shkaktarit të zjarrit po zhvillohen nga specialistët e hetimit të zjarreve të Policisë Kantonale të Cyrihut, Instituti i Mjekësisë Ligjore të Cyrihut dhe Prokuroria Publike./Albinfo.ch

The post Arrestohen dy persona pas zjarrit në qendrën federale të azilit në Cyrih appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.