Dy të vdekur dhe dy të plagosur rëndë nga një sulm me armë në Irlandën e Veriut

Dy persona kanë humbur jetën dhe dy të tjerë janë plagosur rëndë pas një sulmi me armë zjarri që ka ndodhur mëngjesin e së mërkurës në fshatin Maguiresbridge, në qarkun Fermanagh të Irlandës së Veriut, rreth 120 kilometra në jugperëndim të Belfastit.

Policia e Shërbimit të Irlandës së Veriut (PSNI) ka rrethuar zonën e ngjarjes dhe ka deklaruar se nuk ka ndonjë rrezik të vazhdueshëm për publikun. Autoritetet ende nuk kanë bërë të ditur ndonjë motiv të mundshëm për këtë akt të dhunshëm.

Sipas Shërbimit të Ambulancës së Irlandës së Veriut, shërbimet emergjente janë thirrur në vendngjarje në orën 08:21 të mëngjesit, në zonën e Drummeer Road.

“Pas vlerësimit dhe trajtimit fillestar në vendngjarje, njëri nga të plagosurit u transportua me helikopter në Spitalin Mbretëror Victoria në Belfast, ndërsa i plagosuri tjetër u dërgua në Spitalin Rajonal South West me autoambulancë”, thuhet në deklaratën e shërbimit të ambulancës.

Policia ka bërë të ditur se rruga Drummeer është aktualisht e mbyllur, duke paralajmëruar për vonesa në rrugët alternative.

Deputetja e Sinn Féin për zonën Fermanagh dhe South Tyrone, Pat Cullen, shprehu tronditjen e saj të thellë për ngjarjen. “Së pari, mendimet e mia janë me viktimat dhe familjet e tyre në këtë kohë tragjike. Jam në kontakt me policinë për këtë situatë që është ende në zhvillim”, u shpreh ajo, duke i bërë thirrje publikut të mos spekulojë mbi detajet e incidentit.

Deputetja e Asamblesë së Irlandës së Veriut nga radhët e Partisë Demokratike Unioniste (DUP), Deborah Erskine, tha se komuniteti është “i tronditur” nga ngjarja që ndodhi në një zonë të qetë rurale.

“Çdokush është thellësisht i prekur nga ajo që ka ndodhur këtë mëngjes,” theksoi ajo.

Deputetja e Unionistëve Ulsterianë për Fermanagh dhe South Tyrone, Diana Armstrong, e cilësoi sulmin si “të dhimbshëm dhe tronditës”.

“Humbja e jetëve dhe plagosjet e rënda kanë shkaktuar tronditje në të gjithë komunitetin lokal. Mendimet e mia janë me familjet e të prekurve dhe me gjithë banorët teksa përballen me këtë tragjedi,” shkroi ajo në rrjetin social X./abcnews.al