Kurti e shkarkoi, Rama e emëroi në krye të SHISH-it: “Shkëlqimi” dhe “rënia” e Vlora Hysenit

Vlora Hyseni, ndaj së cilës Gjykata e Posaçme Kundër Korrupsionit dhe Krimit të Organizuar (GJKKO) ka caktuar masën e sigurisë “arrest në shtëpi” dhe pezullimin nga detyra, u emërua në krye të Shërbimit Informativ Shtetëror (SHISH) në mars të vitit 2023.

Kryeministri shqiptar Edi Rama njoftoi më 17 mars 2023 se i kishte propozuar presidentit të atëhershëm Bajram Begaj emrin e Vlora Hysenit për postin e drejtores së SHISH-it.

Para emërimit në Shqipëri, Hyseni kishte mbajtur postin e zëvendësdrejtoreshës së Agjencisë së Kosovës për Inteligjencë (AKI).

Karriera e saj në institucionet e sigurisë në Kosovë përfundoi në vitin 2021, kur ajo u shkarkua nga detyra. Vendimi u mor nga kryeministri i atëhershëm Albin Kurti, i cili në atë kohë e drejtonte qeverinë e Kosovës.

Dy vite më vonë, Hyseni u rikthye në një post të lartë në fushën e inteligjencës, këtë herë në Shqipëri, pasi Rama e propozoi për drejtimin e SHISH-it.

Tash, pas masës së sigurisë të caktuar nga GJKKO, Hyseni është pezulluar nga detyra dhe ndodhet nën masën “arrest në shtëpi”.

Rasti shënon një kthesë të fortë në karrierën e saj institucionale, nga drejtimi i një prej strukturave kryesore të inteligjencës shqiptare te përballja me një procedurë penale dhe masë sigurie të vendosur nga gjykata.

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.