Bëri ulje urgjente në Antalia, Turqia refuzon të furnizojë me karburant avionin izraelit

Një avion izraelit El Al u desh të bënte ulje emergjente në aeroportin e Antalias në Turqi, për të zbarkuar një pasagjer të sëmurë. Stafi i aeroportit turk më pas refuzoi të furnizonte avionin me karburant për të vazhduar udhëtimin drejt destinacionit të tij.

Fluturimi LY5102 nga Varshava në Tel Aviv duhej të devijohej në aeroportin në Rodos për të furnizuar me karburant atje, tha El Al në një deklaratë.

“Punonjësit në aeroportin e Antalias refuzuan të furnizonin me karburant avionin e linjës ajrore edhe pse ulja emergjente ishte për arsye mjekësore,” thuhet në deklaratë.

Burime diplomatike turke thanë për AFP se avionit iu dha leja për të bërë një ulje emergjente për shkak se një pasagjer nuk ishte mirë. Mediat izraelite raportuan se pasagjerëve iu tha të prisnin një vonesë prej disa orësh në Turqi, pa u lejuar të dalin nga avioni.

Marrëdhëniet midis Izraelit dhe Turqisë janë përkeqësuar që nga fillimi i luftës në Rripin e Gazës, të shkaktuar nga sulmi islamik i Hamasit në tokën izraelite më 7 tetor.

Fluturimet që lidhin dy vendet janë pezulluar.

/abcnews.al