Juventusi feston 129-vjetorin, mbi 42 mijë dhurata për tifozët

Juventusi feston sot, më 1 nëntor 2026, 129-vjetorin e themelimit, duke shënuar këtë përvjetor me aktivitete të veçanta për tifozët në Allianz Stadium të Torinos, përcjell albinfo.ch.

Klubi italian, i themeluar më 1 nëntor 1897 nga një grup nxënësish në Torino, ka zgjedhur ta festojë këtë ditë të rëndësishme së bashku me mbështetësit e tij, në prag të përballjes së mbrëmjes kundër Napolit.

Për këtë rast, Juventusi ka njoftuar se mbi 42 mijë kopje të një botimi special të revistës historike “Hurrà Juventus” do të shpërndahen falas për tifozët e pranishëm në stadium.

Revista, e përgatitur posaçërisht për këtë përvjetor, do të shërbejë si një kujtim i veçantë për mbështetësit e klubit bardhezi.

Një tjetër aktivitet është paraparë pranë tribunës veriore të stadiumit, ku tifozët do të kenë mundësi të lënë mesazhe urimi, kujtime personale dhe mendime për klubin e tyre të zemrës.

Përmes kësaj nisme, Juventusi synon t’i përfshijë tifozët në festimin e përvjetorit dhe t’u japë mundësinë që mesazhet e tyre të bëhen pjesë e kësaj dite historike.

Në mesazhin e publikuar në faqen zyrtare, klubi ka kujtuar rrugëtimin e tij që nga themelimi, duke theksuar se rinia dhe dëshira për të ecur përpara mbeten pjesë e identitetit të Juventusit.

Me moton “We Are Youth Since 1897”, Juventusi ka përcjellë mesazhin se, pavarësisht historisë së gjatë, vazhdon ta ruajë shpirtin rinor dhe ambicien për suksese të reja.

Festimet do të vazhdojnë sonte në Allianz Stadium, ku Juventusi do të përballet me Napolin, në një mbrëmje që bashkon futbollin me 129 vjet histori të klubit italian.

The post Juventusi feston 129-vjetorin, mbi 42 mijë dhurata për tifozët appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.