Kianoush Rostami i sjell Kosovës medaljen e tetë në “Taranto 2026”
Kosova ka fituar medaljen e tetë në Lojërat Mesdhetare “Taranto 2026”, falë paraqitjes së peshëngritësit Kianoush Rostami, transmeton albinfo.ch.
Rostami, i cili është nga Irani, por prej vitit 2025 përfaqëson Kosovën në arenën ndërkombëtare, fitoi medaljen e argjendtë në stilin e shkëputjes, në kategorinë deri në 95 kilogramë.
Peshëngritësi kosovar pati vetëm një provë të suksesshme në këtë disiplinë. Në tentimin e dytë, ai ngriti 166 kilogramë, rezultat që i mjaftoi për të siguruar medaljen e argjendtë.
Medalja e artë i takoi algjerianit Faris Touairi, i cili ngriti 169 kilogramë.
Rostami do të ketë mundësi të luftojë edhe për një medalje tjetër, pasi në peshëngritje medaljet ndahen veçmas për të dyja disiplinat – shkëputjen dhe shtytjen. Edhe para garës ishte raportuar se ai mund të synonte dy medalje për Kosovën.
Për Rostamin, kjo është një tjetër paraqitje e rëndësishme në karrierën e tij të gjatë. Ai është një emër i njohur në peshëngritjen botërore dhe ka fituar medalje të artë olimpike për Iranin në Rio 2016. Në mars të vitit 2025 mori shtetësinë e Kosovës, ndërsa më vonë fitoi të drejtën për ta përfaqësuar vendin.
Me medaljen e Rostamit, Kosova e ka çuar në tetë numrin e medaljeve të fituara në “Taranto 2026”, ndërsa Lojërat Mesdhetare të këtij edicioni zhvillohen nga 21 gushti deri më 3 shtator.
Tashmë vëmendja mbetet te gara e Rostamit në stilin e shtytjes, ku ai do të kërkojë ta pasurojë edhe më tej bilancin e medaljeve të Kosovës. /Albinfo.ch
The post Kianoush Rostami i sjell Kosovës medaljen e tetë në “Taranto 2026” appeared first on Albinfo.
Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.
