Messi me mesazh rrëqethës pas humbjes së babait: Nuk e di çfarë do të bëj pa ty, s’e di si të vazhdoj më tej

Lionel Messi ka reaguar për herë të parë pas vdekjes së babait të tij, duke ndarë një mesazh prekës për humbjen dhe kujtimet që ka me të.

Në mesazhin e tij, Messi ka rrëfyer dhimbjen e madhe pas humbjes së të atit, duke ngritur edhe dyshime për të ardhmen e tij në futboll.

Ky është mesazhi i plotë i Messit për babain e tij:

Baba, ende nuk mund ta besoj që nuk je më. Nuk mund ta besoj që nuk do të të shoh më, që nuk do të flasim më. E di që po vuaje dhe se kjo ishte zgjidhja më e mirë, por ike shumë shpejt. Kishim ende kaq shumë gjëra për të shijuar së bashku.

Gjithmonë më kërkoje të luaja në Botërorin e fundit dhe pikërisht pak ditë para se të fillonte, gjendja jote u përkeqësua. Ishte hera e parë që nuk do të ishe i pranishëm në një turne, por mami më thoshte se do të bëheshe mirë dhe se do të ishe në gjendje të udhëtoje. Të thashë se do të arrinim në finale dhe se do të mund të shihje një ndeshje.

Erdha te ti sepse nuk mund të flisja për gjithçka që kishte ndodhur. Nuk mund të shijoje asgjë. Nuk dolëm kampionë, por ti nuk e dije kurrë se sa shumë e shijuam çdo ndeshje. Edhe një herë, kishe të drejtë: duhej të isha aty dhe të luaja.

Po ta them këtë sepse ishte e vetmja gjë për të cilën nuk mundëm të flisnim, pasi gjithçka tjetër e di tashmë. Flisnim çdo ditë dhe shiheshim sa herë që mundeshim, duke pasur parasysh angazhimet e mia.

Nuk e di çfarë do të bëj pa ty, nuk di si të vazhdoj më tej. Gjithmonë kam luajtur futboll, por tani kam shumë dyshime nëse do të vazhdoj ta bëj këtë edhe për shumë kohë. Ishe pranë meje që në fillim e deri shumë pranë fundit. Pse nuk rezistove edhe pak më gjatë që ta përfundonim së bashku?

E di që lumturia jote ishte të shihje familjen, gruan, fëmijët dhe, mbi të gjitha – pa e ditur të tjerët – të më shihje mua duke luajtur…

Ka qenë gjithmonë kështu që kur isha i vogël. Më çoje në të gjitha seancat stërvitore sapo ktheheshe nga puna. Shumë herë të çoja unë te shtëpia e mamit, sepse ti ishe në punë.

Sigurisht, nuk humbisje asnjë ndeshje. Sa shumë vuaje duke më parë dhe sa shumë e shijoije, edhe pse nuk më bëje kurrë shumë komplimente.

Ishe baba, mik dhe përfaqësues. Gjithmonë ishe njeriu që duhej të ishe në çdo moment dhe nuk gabove kurrë. Përtej ndonjë vërejtjeje apo debati, ti gjithmonë kishe të drejtë. Në fund, gjithçka u përmblodh te ajo që the ti.

Do të më mungosh shumë, por do të jesh gjithmonë i pranishëm, veçanërisht në edukimin e fëmijëve të mi, sepse unë i mësoj dhe i edukoj ata ashtu siç bëre ti me mua.

Prehu në paqe dhe na ruaj nga lart, ashtu siç bëre këtu. Faleminderit për gjithçka.

Të dua, babi.

Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.