Trump i ndryshon emrin, Kanadaja: Do të quhet Liqeni Ontario sot dhe përgjithmonë

Presidenti amerikan Donald Trump ka hapur një front të ri në marrëdhëniet tashmë të tensionuara mes Shteteve të Bashkuara dhe Kanadasë, duke nënshkruar një urdhër ekzekutiv për riemërtimin e Liqenit Ontario në “Liqeni i Amerikës”.

Vendimi shkaktoi reagim të menjëhershëm nga kryeministri kanadez Mark Carney, i cili deklaroi se për Kanadanë liqeni do të vazhdojë të quhet Ontario “sot dhe përgjithmonë”.

“Kanadezët e dinë se duhet t’i quajnë gjërat me emrat e tyre të ligjshëm dhe ky liqen quhet Liqeni Ontario, sot dhe përgjithmonë”, shkroi Carney në platformën X.

Kryeministri kanadez theksoi gjithashtu se emri i liqenit daton më shumë se 400 vjet më parë, shumë përpara krijimit të Konfederatës Kanadeze dhe Deklaratës së Pavarësisë së Shteteve të Bashkuara.

Trump e nënshkroi urdhrin ekzekutiv në Shtëpinë e Bardhë, ndërsa në Zyrën Ovale u vendos një hartë ku liqeni shfaqej tashmë me emrin “Lake America”, të shkruar me germa të mëdha të kuqe.

Në urdhrin ekzekutiv thuhet se Shtetet e Bashkuara janë “mbrojtësi më i madh i Liqeneve të Mëdha” dhe se SHBA-ja pretendon pjesën më të madhe të vëllimit të Liqenit Ontario, pasi zonat më të thella të tij ndodhen në territorin amerikan.

Megjithatë, vendimi i Trump nuk nënkupton njohje ndërkombëtare të emrit të ri. Për Kanadanë, emërtimi zyrtar mbetet Liqeni Ontario.

Trump la të kuptohet gjithashtu se ky mund të mos jetë ndryshimi i fundit i emrave gjeografikë.

“Kemi një gji dhe kemi një liqen. Na mungon vetëm një oqean. Pra, mund ta ndryshojmë emrin e Atlantikut ose të Paqësorit. Mund t’i ndryshojmë të dyja”, deklaroi presidenti amerikan.

Në fillim të mandatit të tij të dytë, Trump kishte urdhëruar gjithashtu ndryshimin e emrit të Gjirit të Meksikës në “Gjiri i Amerikës”. Ai ka deklaruar në mënyrë të përsëritur se Kanadaja duhet të bëhet shteti i 51-të i SHBA-së.

Riemërtimi i Liqenit Ontario vjen në një moment kur marrëdhëniet mes Uashingtonit dhe Otavës janë tensionuar ndjeshëm për shkak të mosmarrëveshjeve tregtare.

Trump ka akuzuar Kanadanë për trajtim të padrejtë ndaj Shteteve të Bashkuara dhe ka kritikuar ashpër autoritetet kanadeze.

Ndërkohë, Uashingtoni është përgatitur të vendosë tarifa të reja ndaj një sërë produktesh kanadeze, pasi Ottawa ndërpreu negociatat tregtare.

Lëvizja e fundit e Trump rrezikon të thellojë më tej përplasjen mes dy vendeve, në një kohë kur Kanadaja kishte shprehur shpresën për rifillimin e bisedimeve tregtare.

The post Trump i ndryshon emrin, Kanadaja: Do të quhet Liqeni Ontario sot dhe përgjithmonë appeared first on InfoShqip.com.

Burimi i lajmit: infoshqip.com
Shënim: Ky material është përpunuar për qëllime informimi nga Portali Kosova.Today.