Egjipti na mbush sofrën me fasule, Kosova vazhdon të varet nga importi

Egjipti prin bindshëm në furnizimin e tregut kosovar, ndërsa miliona euro vazhdojnë të shpenzohen për importin e një produkti që mund të kultivohet edhe në vend.

Kosova vazhdon të mbetet e varur nga importi edhe për një prej produkteve bazë të konsumit familjar – fasulen.

Të dhënat e importit për periudhën janar–tetor 2026 tregojnë se në Kosovë janë importuar rreth 3.76 milionë kilogramë fasule, me një vlerë totale prej afërsisht 3.85 milionë eurosh, shkruan ORAinfo.

Shteti që prin bindshëm në furnizimin e tregut kosovar është Egjipti, nga i cili janë importuar rreth 2.29 milionë kilogramë fasule, me vlerë mbi 2.2 milionë euro.

Në vendin e dytë renditet Kirgistani, me afro 1.24 milionë kilogramë, ndërsa pas tyre vijnë Polonia, Italia, Kroacia dhe Hungaria.

Shifrat tregojnë qartë përqendrimin e furnizimit: vetëm Egjipti dhe Kirgistani përbëjnë afro 94 për qind të sasisë së importuar në kategoritë e fasules të përfshira në këtë analizë.

Kosova, e varur nga prodhimi i huaj

Importi i miliona kilogramëve fasule ngre pikëpyetje serioze për kapacitetet e prodhimit vendor dhe mbështetjen që i ofrohet bujqësisë në Kosovë.

Përderisa fermerët vendorë përballen me kosto të larta të prodhimit, mungesë të sigurisë në treg dhe sfida të vazhdueshme, tregu kosovar vazhdon të furnizohet në sasi të mëdha nga vendet e huaja.

Këto të dhëna nuk tregojnë vetëm vëllimin e importit, por hapin edhe një debat më të gjerë për sigurinë ushqimore, politikat bujqësore dhe mundësinë e zëvendësimit të një pjese të importit me prodhim vendor. /ORAinfo/

Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.