Zvicra lejon ukrainasit me statusin S të vazhdojnë udhëtimet jashtë vendit

Qeveria zvicerane ka vendosur të ruajë të drejtën e refugjatëve ukrainas me statusin e mbrojtjes S për të udhëtuar jashtë Zvicrës dhe për t’u kthyer pa pasur nevojë për autorizim të veçantë. Ndërkohë, për azilkërkuesit dhe personat e tjerë me pranim të përkohshëm parashikohen kufizime më të rrepta.

Këshilli Federal i Zvicrës ka miratuar të mërkurën, më 11 nëntor 2026, mesazhin drejtuar Parlamentit për ndryshimin e Ligjit për të Huajt dhe Integrimin, me qëllim rregullimin e udhëtimeve jashtë vendit për personat që kërkojnë mbrojtje në Zvicër, shkruan swissinfo.ch, transmeton albinfo.ch.

Sipas propozimit, shtetasit ukrainas që gëzojnë statusin e veçantë S do të vazhdojnë të kenë mundësi të udhëtojnë jashtë Zvicrës dhe të rikthehen pa kërkuar leje paraprake nga autoritetet e migracionit.

Kjo përjashtim synon të ruajë trajtimin e veçantë që u është ofruar refugjatëve ukrainas që nga marsi i vitit 2022, kur Zvicra aktivizoi për herë të parë statusin S pas fillimit të luftës në Ukrainë.

Ndryshe nga ukrainasit me status S, azilkërkuesit dhe personat e pranuar përkohësisht në Zvicër do të përballen me kufizime të konsiderueshme.

Në parim, atyre nuk do t’u lejohet të udhëtojnë as në vendin e origjinës dhe as në shtete të tjera.

Sekretariati Shtetëror për Migracionin (SEM) do të mund të autorizojë udhëtime të tilla vetëm në raste të jashtëzakonshme.

Parlamenti zviceran kishte kërkuar vendosjen e këtyre rregullave që në vitin 2021, por zbatimi i tyre ishte shtyrë për shkak të situatës së krijuar nga lufta në Ukrainë dhe aktivizimit të statusit të mbrojtjes S.

Sipas autoriteteve federale, ruajtja e lirisë së udhëtimit për ukrainasit është gjithashtu në përputhje me praktikat e Bashkimit Evropian. Personat me pasaportë biometrike ukrainase mund të qëndrojnë pa vizë në zonën Shengen deri në 90 ditë, sipas rregullave përkatëse.

Megjithatë, për udhëtimet në Ukrainë, legjislacioni zviceran parashikon një kufizim prej 15 ditësh gjatë një periudhe gjashtëmujore.

Qeveria zvicerane ka konfirmuar më herët se statusi i mbrojtjes S për refugjatët ukrainas nuk do të hiqet para 4 marsit 2028, për shkak të mungesës së perspektivës për stabilizim të qëndrueshëm të situatës në Ukrainë.

Rregullimi i veçantë për udhëtimet do të mbetet në fuqi për aq kohë sa të vazhdojë statusi S.

Ndryshimet ligjore duhet ende të përfundojnë procedurën parlamentare, ndërsa qëllimi i tyre është të vendosin kufizime më të qarta për udhëtimet e azilkërkuesve, pa cenuar të drejtat ekzistuese të udhëtimit të ukrainasve me statusin e mbrojtjes S.

The post Zvicra lejon ukrainasit me statusin S të vazhdojnë udhëtimet jashtë vendit appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.