Alarm para verdiktit për krerët e UÇK-së – Kosova përgatitet për tubime masive më 16 shtator

Kosova po përgatitet për një ditë të tensionuar më 16 shtator, kur në Hagë pritet të shpallet aktgjykimi ndaj ish-presidentit Hashim Thaçi dhe ish-krerëve të UÇK-së, Kadri Veseli, Rexhep Selimi dhe Jakup Krasniqi.

Në prag të verdiktit, autoritetet e disa vendeve kanë përditësuar këshillat e sigurisë për qytetarët e tyre në Kosovë, duke paralajmëruar për mundësinë e tubimeve të mëdha në Prishtinë dhe në qytete të tjera.

Qeveria kanadeze paralajmëron se më 16 shtator mund të ketë tubime të mëdha në Prishtinë dhe në pjesë të tjera të Kosovës, ndërsa këshillon qytetarët të shmangin zonat ku zhvillohen protesta dhe tubime, të ndjekin informacionet lokale dhe të jenë të përgatitur për ndryshime në planet e tyre.

Edhe autoritetet britanike kanë përditësuar këshillat e udhëtimit për Kosovën, duke paralajmëruar për tubime të mëdha publike në Prishtinë dhe qendra të tjera urbane, të cilat mund të shkaktojnë pengesa në qarkullim.

Ndërkohë, në Kosovë tashmë janë organizuar tubime në mbështetje të Thaçit, Veselit, Selimit dhe Krasniqit. Mijëra qytetarë morën pjesë në protestën e së shtunës në Prishtinë, ndërsa në qytet janë vendosur edhe ekrane me numërim mbrapsht deri në shpalljen e aktgjykimit.

Aktgjykimi në Hagë pritet të shpallet të mërkurën, më 16 shtator, në orën 10:00 sipas kohës lokale në Hagë. Rasti ka ngjallur vëmendje të madhe në Kosovë, ndërsa autoritetet po përgatiten për zhvillimet e mundshme pas shpalljes së verdiktit.

Thaçi, Veseli, Selimi dhe Krasniqi i kanë mohuar akuzat dhe kanë kërkuar pafajësi. Prokuroria ka kërkuar dënime deri në 45 vjet burgim për secilin.

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.