Ambasadori amerikan në NATO, Whitaker: SHBA mbetet partneri më i fuqishëm i Kosovës
Ambasadori amerikan në NATO, Matthew Whitaker në përmbyllje të vizitës dyditore në Kosovë dhe pas takimit me KFOR theksoi se SHBA-të janë aleati më i fuqishëm i Kosovës.
“Për më shumë se 26 vjet, SHBA-të e kanë mbështetur KFOR-in si një shtyllë stabiliteti. Pata një takim të rëndësishëm me Gjeneral Major Ozkan Ulutas, Komandant i KFOR-it, për të diskutuar misionin tonë në Ballkanin Perëndimor. Ne jemi partneri më i fortë i Kosovës, duke rritur aftësinë e vendit për të mbrojtur veten. Ndërsa u bëjmë thirrje aleatëve të marrin përgjegjësi më të mëdha për sigurinë evropiane, KFOR-i mbetet kritik për një rajon të sigurt dhe rezilient”, ka shkruar ambasadori amerikan.
Ndërkohë, Ambasada amerikane në Prishtinë përmes një porosie në rrjetet sociale ka shkruar përshtypjet e kësaj vizite.
“Ambasada e SHBA-së ishte krenare që lehtësoi vizitën e Ambasadorit Whitaker në Kosovë. Gjatë udhëtimit të tij, Ambasadori Whitaker u takua me udhëheqësit e Kosovës, personelin ushtarak amerikan dhe partnerët që punojnë për të forcuar sigurinë dhe stabilitetin e vendit.Së bashku, Shtetet e Bashkuara dhe Kosova vazhdojnë të përparojnë interesat e përbashkëta të sigurisë dhe të forcojnë stabilitetin rajonal”, thuhet në njoftimin e Ambasadës.
Zyrtari i lartë amerikan në NATO në fillim të vizitës ditën e martë u takua me ushtruesen e detyrës së presidentit, Albulena Haxhiu dhe kryeministrin Albin Kurti, ku u theksua mbështetja e vazhdueshme nga Shtetet e Bashkuara të Amerikës dhe rëndësia e partneritetit strategjik.
Kryeministri Kurti nënvizoi rolin kyç të NATO dhe nevojën për anëtarësimin e Kosovës, ndërsa paralajmëroi për rreziqet nga Serbia, e mbështetur nga Rusia dhe Kina.(INA)
Burimi i lajmit:ina-online.netShënim: Ky material është marrë nga burime publike në internet dhe është përpunuar për qëllime informimi nga Portali Kosova.Today.Portali nuk mban përgjegjësi për përmbajtjen origjinale të publikuar nga burimi. Nëse keni ankesa apo kërkesa për heqje materiali, ju lutem na kontaktoni në facebook/KosovaToday Faleminderit për mirëkuptimin.
