Chelsea “hakmerret” ndaj Milanit! Luftë në merkato për yllin e Strasburgut!

Një përplasje e re në horizont mes Chelseat dhe Milanit, këtë herë në merkato. Sipas raportimeve nga Tuttosport, klubi londinez po e përdor ndikimin e tij te Strasbourg për të vështirësuar përpjekjet e kuqezinjve për të transferuar mbrojtësin Guela Doué – një lëvizje që shihet si “hakmarrje” pas bisedimeve të dështuara për Mike Maignan.

Muajin e kaluar, Chelsea ishte shumë pranë arritjes së marrëveshjes për portierin e Milanit, por gjithçka u ndal kur klubi italian refuzoi të pranojë ofertën për nën 20 milionë euro. Blutë donin ta mbyllnin marrëveshjen shpejt, përpara Kupës së Botës për Klube, por Milani qëndroi i palëkundur në kërkesat financiare, përcjell ORAinfo.

Tani, Milani është në kërkim të një mbrojtësi të djathtë, dhe Guela Doué i Strasburgut është objektivi kryesor. Kuqezinjtë kanë dorëzuar dy oferta për lojtarin – e fundit prej 18 milionë euro – por klubi francez ende nuk është bindur. Dhe këtu hyn Chelsea.

Duke qenë se Strasburgu ndan të njëjtën pronësi me Chelsean, Blutë thuhet se po ushtrojnë ndikim për të mos e lejuar transferimin e Doué me kushtet që kërkon Milani, duke ngritur dyshime se po përdorin këtë situatë për të “kthyer reston” pas negociatave për Maignan.

Një luftë e ftohtë merkatoje?

Ky episod nxjerr në pah tensionet që mund të lindin mes klubeve të mëdha, ku jo gjithmonë luhet vetëm për lojtarë, por edhe për prestigj dhe marrëdhënie afatgjata. Nëse Milani nuk arrin të bindë Strasburgun (dhe rrjedhimisht Chelsean), mund të detyrohet të zhvendosë vëmendjen drejt alternativave të tjera.

Për momentin, duket se Chelsea e ka ndalur topin në anën e Milanit dhe pret një lëvizje tjetër në këtë ndeshje të ndërlikuar merkatoje. /ORAinfo/