Rama citon Aleksandrin e Madh: As njeriu më i fuqishëm nuk i shpëton vdekjes

Kryeministri shqiptar, Edi Rama u bëri thirrje operatorëve të biznesit ushqimor të garantojnë sigurinë e produkteve për konsumatorët, duke theksuar se standardet në Shqipëri duhet të përputhen me ato të Bashkimit Evropian.

Gjatë një takimi me përfaqësues të sektorit, Rama tha se siguria ushqimore do të jetë “prioritet absolut”, duke shtuar se qeveria do të punojë në partneritet me bizneset për të arritur këtë objektiv.

“Keni detyrën t’u shisni produkte të sigurta konsumatorëve. Kjo është pjesë e paketës së dijes që vjen nga Bashkimi Evropian, për të na bërë të aftë të tregtojmë produkte ushqimore të sigurta,” tha ai.

Në fund të fjalës së tij, Rama përdori një referencë historike për të përcjellë një mesazh mbi përkohshmërinë e jetës, duke cituar Aleksandrin e Madh.

Ai rikujtoi një tregim sipas të cilit, në shtratin e vdekjes, Aleksandri kishte kërkuar që mjekët më të mirë të ecnin pas arkivolit të tij, duart t’i mbeteshin jashtë dhe rruga drejt varrit të mbulohej me pasuri.

“Që njerëzit të kuptojnë se as njeriu më i fuqishëm nuk i shpëton vdekjes dhe se pasuria që grumbullohet në këtë botë mbetet këtu,” tha Rama.

Ai e mbylli mesazhin me një reflektim për jetën.

“Jeta ikën shumë shpejt, miqtë e mi,” shtoi ai.

Burimi i lajmit:ina-online.net
Shënim: Ky material është marrë nga burime publike në internet dhe është përpunuar për qëllime informimi nga Portali Kosova.Today.Portali nuk mban përgjegjësi për përmbajtjen origjinale të publikuar nga burimi. Nëse keni ankesa apo kërkesa për heqje materiali, ju lutem na kontaktoni në facebook/KosovaToday Faleminderit për mirëkuptimin.