Debutimi i mundshëm i Marcus Rashford me Barcelonën është anuluar për shkak të ‘shkeljes serioze të kontratës’ nga ana e organizatorit

Debutimi i mundshëm i Marcus Rashford me Barcelonën është shtyrë. Huazimi i yllit të Manchester United u konfirmua të mërkurën në mbrëmje, dhe 27-vjeçari pritej t’i bashkohej ekipit të trajnerit Hansi Flick gjatë turit parasezonal në Azi.

Ndeshja e parë miqësore ishte planifikuar të zhvillohej të dielën në Japoni kundër Vissel Kobe. Por Barcelona publikoi një deklaratë ku njoftonte anulimin e udhëtimit për shkak të “shkeljeve serioze kontraktuale” nga organizatorët.

“FC Barcelona njofton se është detyruar të anulojë pjesëmarrjen në ndeshjen e planifikuar për të dielën në Japoni, për shkak të shkeljeve serioze kontraktuale nga ana e organizatorit,” thuhet në deklaratë.

Klubi është duke shqyrtuar mundësinë për të vazhduar pjesën tjetër të turneut në Korenë e Jugut, ku janë planifikuar dy ndeshje: më 31 korrik ndaj FC Seoul dhe më 4 gusht ndaj Daegu FC — nëse organizatorët përmbushin disa kushte të caktuara.

Barcelona shprehu keqardhje për anulimin dhe ndikimin që do të ketë te shumë tifozë në Japoni, por njëkohësisht theksoi se kjo do t’i japë Rashfordit më shumë kohë për t’u përshtatur me skuadrën në stërvitje.

Ndeshja e parë zyrtare e Rashford me Barcelonën pritet të jetë më 16 gusht në kampionat kundër Mallorcës.

Detaje financiare të marrëveshjes

Barcelona do të mbulojë tërësisht pagën javore të Rashford, e cila kap vlerën e rreth 383,500 euro. Një pagë që, sipas raportimeve, ai nuk do ta marrë nëse transferimi bëhet i përhershëm në vitin 2026.

Huazimi është bërë me opsion blerjeje në verën e ardhshme për rreth 30.7 milionë euro. Kjo formulë i ndihmon katalanasit të ruajnë balancën financiare, ndërkohë që Rashford ka ambicie për të siguruar vendin në përfaqësuesen angleze për Kupën e Botës 2026.

Manchester United, nga ana tjetër, do të kursejë rreth 17.7 milionë euro në paga gjatë sezonit, fonde të cilat mund të përdoren për ristrukturimin e skuadrës nga drejtori i ri sportiv.

Marrëveshja nuk parashikon rikthimin e Rashford në “Old Trafford”, duke i dhënë fund një lidhjeje 20-vjeçare me klubin.