Diogo Jota i bëri një telefonatë një shoku të ngushtë disa orë para aksidentit që la të vdekur atë dhe vëllain e tij

Është zbuluar se Diogo Jota foli në telefon me një mik të ngushtë disa orë para aksidentit me makinë që la të vdekur atë dhe vëllain e tij Andre Silva.

Aksidenti me makinë ndodhi në orët e para të mëngjesit të së enjtes në Provincën e Zamorës, në veriperëndim të Spanjës.

Sipas gjetjeve fillestare të policisë, makina – e cila ishte një Lamborghini – pësoi një shpërthim gome ndërsa po parakalonte në rrugën A52 dhe, sipas dëshmitarëve që telefonuan shërbimin e emergjencës 1-1-2, shpejt u “përfshi nga flakët”.

Garda Civile e Spanjës lëshoi një deklaratë duke konfirmuar se dy viktimat ishin identifikuar si ylli i Liverpoolit, Jota, dhe vëllai i tij, Silva, i cili luante për ekipin portugez të nivelit të dytë, Penafiel.

Më vonë u raportua se dyshja po udhëtonte për në Santander për të marrë një traget për në Angli, me Jotën që i ishte këshilluar të mos fluturonte sepse i ishte nënshtruar kohëve të fundit një operacioni në mushkëri.

Që atëherë kanë vërshuar homazhet për dyshen nga bota e futbollit dhe më gjerë.

Trajneri i Liverpoolit, Arne Slot, shkroi një deklaratë emocionale të enjten në mbrëmje, me kapitenin Virgil van Dijk midis lojtarëve të Reds që bënë të njëjtën gjë. Ashtu edhe Mohamed Salah, i cili reagoi gjatë ditës së premte.

Jota lindi pranë Gondomarit në Porto, ku do të bëhet edhe funerali i tij të shtunën në mëngjes.

Ai luajti për klubin lokal Gondomar SC që nga mosha 9 deri në 17 vjeç, përpara se të largohej për në ekipin tjetër portugez, Pacos de Ferreira, në vitin 2013.

Presidenti i Gondomar, Alvaro Cerqueira, ka zbuluar tani se foli me Jotën në orën 22:00 – më pak se tre orë para aksidentit tragjik dhe tregoi detaje të vogla të bisedës së tyre.

“Ishte pak pas orës 22:00. Ne po flisnim në telefon dhe ai ishte mirë”, ka thënë fillimisht Cerqueira për gazetën portugeze JN.

“Ne flisnim pothuajse çdo javë dhe e di që ai po kalonte një moment të lumtur”.
“Kur Diogo kishte nevojë të stërvitej gjatë pushimit nga sezoni, ai kërkonte të vinte këtu dhe ne gjithmonë i vinim gjithçka në dispozicion. Zakonisht vinte edhe vëllai i tij, dhe të dy stërviteshin”.

“Është e vështirë të flasësh në një kohë si kjo, por ajo që do të mbetet është imazhi i dy njerëzve shumë të përulur, të cilët lënë një boshllëk të madh”, përfundoi presidenti i Gondomar SC.

Gondomar do të mbajë një ditë zie për Jotën dhe Silvën sot (e premte), me flamurin e Bashkisë që do të ulet në gjysmështizë në të gjitha ndërtesat dhe objektet.