Dy shqiptarë arrestohen në Itali me dhjetëra doza droge

Dy të rinj shqiptarë, të ardhur në Itali me vizë turistike, janë arrestuar nga karabinierët në Terni, pasi u kapën me sasi të konsiderueshme droge të gatshme për shitje, transmeton albinfo.ch.

Një 22-vjeçar me precedentë penalë u ndalua në Viale Centurini duke drejtuar një fuoristradë të marrë me qira. Gjatë kontrollit, policia gjeti 23 pako me kokainë, tre me kanabis dhe rreth 1 mijë euro para të gatshme. Ai rezultoi pozitiv edhe në testin e drogës dhe u akuzua për drejtim mjeti nën ndikimin e substancave narkotike. Gjykata i ndaloi qëndrimin në Terni dhe i hoqi lejen e drejtimit.

Pak më herët, në Via del Centenario, u ndalua një 19-vjeçar shqiptar, tek i cili u gjetën 37 pako me kokainë. Edhe ai u arrestua për posedim me qëllim shitje.

Operacioni çoi në prangosjen e dy të rinjve dhe sekuestrimin e dhjetëra dozave droge të destinuara për tregun lokal./Albinfo.ch

The post Dy shqiptarë arrestohen në Itali me dhjetëra doza droge appeared first on Albinfo.