Dyshime për sabotim/ Policia suedeze nis hetimet për incidentin e pompave të ujit në detin Baltik

Policia suedeze po heton një rast të dyshuar sabotimi në ishullin Gotland, pas një incidenti që ndodhi më 2 mars të këtij viti.

Njësia e ujësjellës-kanalizimeve të komunës së Gotlandit mori një alarm për defekt në një pompë uji. Sipas burimeve të Aftonbladet, dëmtimi i pompës mund të kishte lënë të gjithë ishullin pa ujë.

Ky incident është pjesë e një serie ngjarjesh të ngjashme në Detin Baltik, ku kabllot nënujore janë dëmtuar ose prerë në mënyrë të dyshimtë. Në nëntor dhe dhjetor 2024, kablloja C-Lion1, që lidh Finlandën me Gjermaninë, u dëmtua, duke çuar në hetime për sabotim.

Gjithashtu, më herët në nëntor 2024, një kabllo që lidhte Suedinë me Lituaninë u dëmtua, duke nxitur hetime të ngjashme.

Autoritetet suedeze dhe finlandeze janë angazhuar në hetime të përbashkëta për të zbuluar shkakun e këtyre dëmtimeve dhe për të identifikuar përgjegjësit. Në përgjigje të këtyre incidenteve, Suedia ka dërguar anije luftarake për të monitoruar situatën në Detin Baltik.