Fluturimet nga Cyrihu këtë verë më pak të vonuara se një vit më parë

Gjatë kësaj vere, gjysma e avionëve në Aeroportin e Cyrihut u nisën me vonesë, por situata është përmirësuar ndjeshëm krahasuar me vitin e kaluar, sipas një analize të agjencisë së lajmeve AWP.

Nga fillimi i qershorit deri në mesin e gushtit, 49% e 17,000 fluturimeve komerciale u vonuan mbi 15 minuta. Në verën e vitit 2024, kjo shifër kishte arritur në 58%.

Edhe koha mesatare e vonesave është shkurtuar: këtë vit pasagjerët kanë pritur mesatarisht 38 minuta, ndërsa një vit më parë pritja shkonte deri në 44 minuta. Në disa raste, vonesat janë kompensuar gjatë fluturimit.

Numri i fluturimeve të shtyra pas orës 23:00 ka rënë gjithashtu. Këtë verë, vetëm 116 avionë janë nisur mes orës 23:00 dhe 23:30,  periudha e lejuar për reduktimin e vonesave  krahasuar me 231 një vit më parë.

Kjo çështje është aktualisht pjesë e një debati politik, pasi një iniciativë kantonale për “pushim nate” kërkon kufizimin e orarit të operimit të aeroportit nga ora 06:00 deri në 23:00, transmeton albinfo.ch.

Masat e marra për përmirësim

Për të rritur pikësinë e fluturimeve, aeroporti i Cyrihut ka shtuar staf dhe ka vendosur një sistem kamerash që zbulon vonesat në përgatitjen e avionëve, si dhe një sistem planifikimi për optimizimin e proceseve.

Kompania ajrore SWISS ka zbatuar 300 masa që nga vjeshta e kaluar, duke përfshirë kohë shtesë për pasagjerët transit, menaxherë të shërbimit të avionëve dhe rezerva më të larta. Të enjten, SWISS pritet të publikojë një raport për funksionimin e saj gjatë verës.

Sipas të dhënave të analizuara, 51% e fluturimeve të SWISS nga Cyrihu u nisën me vonesë mes qershorit dhe gushtit, krahasuar me 61% në vitin 2024.

The post Fluturimet nga Cyrihu këtë verë më pak të vonuara se një vit më parë appeared first on Albinfo.