Formacioni i mundshëm i Barcelonës për sezonin e ardhshëm bazuar në ndeshjet parasezonale deri më tani

Turneu parasezonal i Barcelonës është në kulmin e tij dhe skuadra e drejtuar nga trajneri Hansi Flick po tregon sinjale premtuese ndërsa përgatitet për sezonin 2025/26 në La Liga.

Pas dy ndeshjeve të zhvilluara dhe me edhe dy përballje në horizont – ndaj Daegu FC dhe Como – para startit të kampionatit kundër Mallorcës, ideja për formacionin titullar të katalanasve po bëhet gjithnjë e më e qartë. Dhe le ta themi hapur: ai duket jashtëzakonisht konkurrues.

Deri më tani, Joan Garcia, Alejandro Balde, Pau Cubarsí, Pedri, Raphinha dhe Lamine Yamal kanë qenë titullarë në të dy ndeshjet parasezonale, duke dhënë sinjale se do të jenë pjesë kyçe e planeve të Flickut.

Ndërkohë, emra të mëdhenj si Robert Lewandowski, Frenkie de Jong, Jules Koundé dhe Dani Olmo pritet të rikthehen në formacionin bazë me fillimin e sezonit, duke përforcuar më tej një ekip tashmë të frikshëm në letër.

I vetmi ndryshim krahasuar me formacionin më të fortë të sezonit të kaluar është pozicioni i portierit, ku Joan Garcia duket se po fiton besimin për të qenë zgjedhja e parë.

Pyetja tashmë nuk është nëse Barcelona do të jetë konkurruese, por sa larg mund të shkojë me këtë përbërje. A do të jetë ky viti i rikthimit të lavdisë për “Blaugranat”? /Telegrafi/