Izraeli godet objektiva të Hezbollahut në jug të Bejrutit, banorët të alarmuar pas thirrjeve për evakuim

Ushtria izraelite ka konfirmuar se ka ndërmarrë sulme ajrore ndaj “objektivave terroriste të Forcës Ajrore 127 të Hezbollahut” në periferi jugore të kryeqytetit libanez, Bejrut. Sulmet vijnë pasi Izraeli urdhëroi evakuimin e detyruar në katër zona të Dahiyeh, një lagje e madhe e mbipopulluar në jug të qytetit.

Sipas raportimeve nga Al Jazeera dhe mediave lokale, menjëherë pas urdhrave për evakuim, u dëgjuan dy shpërthime të fuqishme, ndërsa mbi zonë u ngrit tym i zi i dendur. Dëshmitarët thanë se bombardimet krijuan panik të madh, duke shkaktuar trafik të rënduar dhe konfuzion masiv.

Dahiyeh është një zonë ku jetojnë qindra mijëra njerëz dhe shpesh është shënjestruar nga sulmet izraelite. Megjithatë, sipas banorëve dhe autoriteteve, ky është një nga sulmet më të mëdha ajrore në vitet e fundit.

Në njoftimin zyrtar, ushtria izraelite paralajmëroi për shënjestrimin e tetë ndërtesave në katër zona të ndryshme, duke kërkuar nga banorët të qëndrojnë të paktën 800 metra larg tyre. Por në praktikë, thirrjet për evakuim janë përkthyer si paralajmërim për sulme të gjera ndaj të gjithë lagjes.

Banorët e zonës e kanë cilësuar veprimin si “terrorizëm shtetëror”, ndërsa janë shprehur të tronditur për faktin se evakuimi është kërkuar në mes të natës, në prag të një feste fetare.

Autoritetet libaneze kanë reaguar ashpër, duke e cilësuar ndërhyrjen izraelite si një “akt agresioni” dhe “shkelje të hapur të armëpushimit”./abcnews.al