Një në katër ndërtesa në Zvicër tashmë ngrohet me pompë termike

Një në katër ndërtesa banimi në Zvicër ishte e pajisur me pompë termike gjatë vitit 2025, duke dëshmuar rritjen e vazhdueshme të përdorimit të këtij sistemi të ngrohjes.

Sipas të dhënave të publikuara të martën nga Zyra Federale e Statistikave (BFS), në fund të vitit 2025 në Zvicër kishte rreth 1.8 milion ndërtesa me përdorim banimi dhe 4.88 milionë banesa. Pavarësisht rritjes së pompave termike, nafta mbetet burimi kryesor i ngrohjes, me 33% të ndërtesave, ndërsa 17% ngrohen me gaz, përcjell albinfo.ch.

Pjesa e ndërtesave të pajisura me pompë termike ka arritur në 25%, gjashtë herë më shumë se në vitin 2000. Në tri të katërtat e ndërtesave të ndërtuara gjatë dhjetë vjetëve të fundit është instaluar një pompë termike, ndërsa ky sistem përdoret në rreth 30% të shtëpive individuale.

Të dhënat tregojnë gjithashtu se 12% e ndërtesave në Zvicër ngrohen me dru dhe 7% me energji elektrike. Ndërkohë, dallime të konsiderueshme vërehen në përdorimin e gazit mes zonave urbane dhe rurale. Në komunat urbane, 29% e ndërtesave ngrohen me gaz, ndërsa në ato rurale vetëm 4%.

Në Zvicër, sipërfaqja mesatare e banimit për person ishte 46.6 metra katrorë në vitin 2025. Më pak hapësirë mesatare për person kishte rajoni i Liqenit të Gjenevës, me 42.5 metra katrorë, ndërsa vlerat më të larta u regjistruan në Ticino, me 49.8 metra katrorë, dhe në Zvicrën Lindore, me 49.7 metra katrorë.

The post Një në katër ndërtesa në Zvicër tashmë ngrohet me pompë termike appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.