Këshilli i Evropës paralajmëron Shqipërinë: Reforma territoriale pa konsultime të vërteta është e rrezikshme
Këshilli i Evropës kërkon që reforma territoriale në Shqipëri të mos bëhet me nxitim
Ndërsa Kryeministri Edi Rama dhe opozita vijojnë të ndahen për reformën e re territoriale, institucioni europian Këshilli i Evropës paralajmëron se çdo vendim duhet të merret pas konsultimeve të thella me qytetarët dhe pa nxitim.
Në një draft-raport prej 9 faqesh për Shqipërinë, të siguruar nga Top Channel, institucioni europian thekson se çdo ndryshim i hartës administrative duhet të mbështetet në një analizë të plotë të reformës së vitit 2015 dhe në konsultime reale me komunitetet e prekura.
“Ekziston rreziku që gjatë përgatitjes së reformës territoriale të planifikuar për vitin 2026 të zhvillohen vetëm konsultime formale dhe jo thelbësore, nëse qeveria synon të respektojë afatin e njoftuar për zbatimin e saj”, thuhet në raport. Dokumenti vë në dukje se pushteti vendor deri tani ka pasur një rol të kufizuar në këtë proces, ndërsa ekziston rreziku që konsultimet të mbeten vetëm formale nëse reforma synohet të përfundojë brenda afateve të shpallura nga qeveria.
“Duke pasur parasysh afatin e caktuar për zbatimin e reformës, mund të ketë arsye për shqetësim nëse njësitë e qeverisjes vendore konsultohen vetëm në fazën përfundimtare të procesit të vendimmarrjes. Në një rast të tillë, ekziston rreziku që ato të kenë kohë të kufizuar për t’u përgatitur për zbatimin e reformës dhe të mos kenë mundësi të kontribuojnë në mënyrë domethënëse me propozimet e tyre”, theksohet në dokument.
Raporti ngre shqetësimin se, pavarësisht diskutimeve për krijimin e bashkive më të mëdha, një pjesë e rëndësishme e shërbimeve publike vijon të kontrollohet nga pushteti qendror. Menaxhimi i mbetjeve, furnizimi me ujë dhe arsimi përmenden si fusha ku bashkitë nuk ushtrojnë kompetenca të plota, duke kufizuar rolin e tyre në zbatimin e vendimeve të marra në qendër.
Për këtë arsye, raportuesit e Këshillit të Evropës theksojnë se dobësitë e disa bashkive nuk duhet të përdoren si argument për t’u hequr më shumë kompetenca. Dokumenti shkon edhe më tej, duke kërkuar që reforma të mos fokusohet vetëm te numri i bashkive apo kufijtë administrativë.
Sipas raportit, duhet të rishikohet edhe roli i qarqeve, pasi në formën aktuale ato nuk i plotësojnë kriteret për t’u konsideruar njësi të mirëfillta të vetëqeverisjes vendore.
Me pak fjalë
Këshilli i Evropës paralajmëron Shqipërinë që reforma territoriale e planifikuar për vitin 2026 të mos bëhet me nxitim dhe pa konsultime të vërteta me qytetarët. Dokumenti thekson rrezikun e konsultimeve formale dhe kërkon një analizë të plotë të reformës së vitit 2015, si dhe një rol më të gjerë për pushtetin vendor.
Personat e përmendur
Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.
