Kolumbia shpallet ‘nongrata’ nga SHBA-të/ Nuk bashkëpunojnë në luftën kundër drogës

Shtetet e Bashkuara kanë emëruar zyrtarisht Kolumbinë si një vend që “ka dështuar në mënyrë të dukshme” të përmbushë detyrimet e saj për kontrollin e trafikut të drogës, por nuk kanë ndërprerë ndihmën financiare amerikane për Kolumbinë.

Çdo vit, qeveria amerikane certifikon zyrtarisht nëse disa vende bashkëpunojnë plotësisht me përpjekjet kundër drogës të udhëhequra nga SHBA, dhe ata që nuk arrijnë këtë rrezikojnë të humbin financimin amerikan.

Sipas BBC, të hënën, administrata Trump tha se prodhimi i kokainës në Kolumbi kishte arritur nivele rekord nën presidencën e majtë të Gustavo Petro, gjë që udhëheqësi kolumbian e mohoi.

Në përgjigje, qeveria kolumbiane tha se do të ndalonte blerjen e armëve nga SHBA-të. Ministri i Brendshëm Armando Benedetti i tha radios lokale se qeveria e tij do të ndalonte blerjen e armëve amerikane “nga ky moment e tutje”.

Vendet e tjera që SHBA tha se nuk kishin përmbushur objektivat e tyre ishin Afganistani, Bolivia, Mianmari dhe Venezuela.

Kolumbia u shtua në këtë listë për herë të parë që nga viti 1997.

Ky veprim pritet të rëndojë edhe më shumë marrëdhëniet midis qeverisë së majtë të Kolumbisë dhe administratës Trump.

Presidenti Petro iu përgjigj akuzave të SHBA-ve në rrjetet sociale, duke thënë se gjatë kohës së tij në detyrë zona e mbjellë me bimën kokë dhe prodhimi i kokainës kishin arritur nivele rekord.

Gjethet e kokës janë përbërësi kryesor i kokainës dhe Kolumbia ka qenë prej kohësh prodhuesi kryesor i kësaj droge të paligjshme.

Një studim i Zyrës së Kombeve të Bashkuara për Drogat dhe Krimin (UNDOC) gjeti se mbjellja e bimës kokë ishte rritur me 10% në vitin 2023. Të dhënat për vitin 2024 pritet të publikohen muajin e ardhshëm.

Por Petro insiston se rritja e madhe e zonës së mbjellë me kokë ndodhi gjatë qeverisjes së Iván Duque, paraardhësit të tij që qeverisi nga 2018 deri në 2022.

Sipas të dhënave të publikuara nga presidenca kolumbiane, një rekord prej 1,764 ton kokainë është sekuestruar nga forcat e sigurisë midis gushtit 2022, kur Petro erdhi në detyrë dhe nëntorit 2024. Sekuestrime të drogës kanë vazhduar në nivele të larta edhe në vitin 2025, sipas statistikave zyrtare.

Petro gjithashtu tha se për të ulur kultivimin e kokës, është e nevojshme të ulet kërkesa për kokainë në SHBA dhe Evropë.

Nga ana tjetër, SHBA i hodhi përgjegjësinë presidentit Petro, duke thënë se bisedimet e tij të paqes me disa grupe të armatosura, shumë prej të cilave financohen nga trafiku i drogës, kanë penguar luftën kundër drogës.

“Përpjekjet e tij të dështuara për të arritur marrëveshje me grupet narko-terroriste vetëm kanë përkeqësuar krizën”. thuhet në dokumentin presidencial të paraqitur Kongresit Amerikan.

Dokumenti gjithashtu lavdëron “aftësinë dhe guximin” e forcave të sigurisë kolumbiane në përballjen me grupet kriminale.

Ai përfundon duke thënë se “dështimi i Kolumbisë për të përmbushur detyrimet për kontrollin e drogës gjatë vitit të kaluar është përgjegjësi e drejtpërdrejtë e udhëheqjes politike”.

Megjithatë, hap mundësinë për një certifikim të ri të Kolumbisë nëse qeveria e saj “merr masa më agresive për të shkatërruar bimën kokë dhe për të ulur prodhimin dhe trafikun e kokainës”.

Ndërkohë që retorika nga Uashingtoni duket se ka zemëruar presidentin Petro, qeveria e tij do jetë e lehtësuar që decertifikimi nuk ka çuar në ndalim të ndihmës financiare amerikane, thotë korrespondenti i BBC News Mundo në Bogotá, José Carlos Cueto.

Decertifikimi i Kolumbisë vjen në një kohë kur presidenti Trump ka bërë luftën kundër “narko-terroristëve” një prioritet. Të hënën, ai njoftoi se ushtria amerikane kishte shkatërruar një anije të dyshuar venezueliane për trafik droge në ujërat ndërkombëtare në Karaibet Jugore. Trump tha se tre persona u vranë në sulm.

Ai shtoi se SHBA-të kanë prova që anijet i përkisnin grupeve narko-terroriste, por nuk i ka bërë ende publike.  / abcnews.al/