Kosovarët marakli të mishit: U importuan 53 milionë euro mish për shtatë muaj

Të dhënat për janar–korrik tregojnë se Brazili është furnizuesi kryesor i Kosovës me mish gjedhi, ndërsa importet më të larta mujore janë regjistruar në qershor.

Sipas të dhënave zyrtare nga Dogana e Kosovës për periudhën janar–korrik, në Kosovë kanë hyrë rreth 12.6 milionë kilogramë mish gjedhi, me vlerë totale prej 53.92 milionë euro, shkruan ORAinfo.

Brazili është larg furnizuesi më i madh. Vetëm nga ky shtet, Kosova ka importuar mish gjedhi në vlerë prej rreth 43.6 milionë euro, që përbën rreth 81 për qind të gjithë vlerës së importit të kësaj kategorie.

Pas Brazilit, në listën e vendeve kryesore eksportuese drejt Kosovës renditet Holanda, nga e cila gjatë kësaj periudhe janë importuar rreth 3.35 milionë euro mish gjedhi.

Në vendin e tretë është Serbia, me rreth 2.76 milionë euro, ndërsa pas saj vijnë Paraguai, me rreth 2.16 milionë euro, dhe Argjentina, me rreth 1.02 milionë euro.

Importet nga vendet tjera janë dukshëm më të ulëta. Nga Gjermania janë importuar rreth 523 mijë euro, ndërsa nga Polonia rreth 363 mijë euro mish gjedhi.

Nëse këto shifra mblidhen, vetëm pesë furnizuesit kryesorë – Brazili, Holanda, Serbia, Paraguai dhe Argjentina – përbëjnë pothuajse të gjithë importin e mishit të gjedhit në Kosovë gjatë kësaj periudhe, shkruan ORAinfo.

Qershori, muaji me importin më të lartë

Importi i mishit të gjedhit nuk ka qenë i njëjtë gjatë gjithë vitit. Në janar, Kosova importoi mish gjedhi në vlerë prej rreth 7.14 milionë euro.

Në shkurt, vlera ra në rreth 5.79 milionë euro, për t’u rritur sërish në mars, kur importet arritën në rreth 7.68 milionë euro.

Në prill, importi ishte rreth 7.80 milionë euro, ndërsa në maj u rrit në rreth 8.44 milionë euro.

Muaji me vlerën më të madhe të importit ishte qershori, kur Kosova importoi mish gjedhi në vlerë prej rreth 9.15 milionë euro.

Në korrik, importet u ulën lehtë krahasuar me qershorin, por mbetën në nivel të lartë, me rreth 7.92 milionë euro.

Pra, vetëm gjatë majit, qershorit dhe korrikut, Kosova importoi mish gjedhi në vlerë prej rreth 25.5 milionë euro, ose afërsisht gjysmën e totalit të importuar gjatë shtatë muajve.

Shifrat tregojnë gjithashtu se varësia nga Brazili është e theksuar. Vlera e mishit të importuar nga ky shtet është shumëfish më e lartë se ajo e çdo vendi tjetër në listë.

Me 43.6 milionë euro, Brazili ka eksportuar drejt Kosovës rreth 13 herë më shumë mish gjedhi në vlerë sesa Holanda, e cila është furnizuesi i dytë.

Të dhënat janë përllogaritur nga importet e regjistruara në periudhën janar–korrik 2026, duke përfshirë kodet tarifore për mishin e gjedhit të freskët, të ftohur dhe të ngrirë. /ORAinfo/

Burimi i lajmit: orainfo.net
Shënim: Ky material është përpunuar për qëllime informimi nga Portali Kosova.Today.