Ledia Xhoga në garë për “Booker Prize”, e dyta shqiptare pas Ismail Kadaresë

Shkrimtarja shqiptare Ledia Xhoga ka hyrë në mesin e emrave më premtues të letërsisë botërore, duke u përfshirë në listën e gjatë të pretendentëve për çmimin prestigjioz Booker Prize 2025 me romanin e saj debutues “Misinterpretation”, transmeton albinfo.ch.

Ky sukses shënon një moment historik për letërsinë shqipe, pasi Xhoga bëhet vetëm autorja e dytë shqiptare që arrin një nominim të tillë, pas kolosit Ismail Kadare, fitues i këtij çmimi në vitin 2005.

Romani “Misinterpretation”, i botuar në vitin 2024, ka bërë jehonë të madhe që nga publikimi, duke marrë vlerësime të shumta nga kritika letrare në SHBA dhe më gjerë. Veprës iu dha Çmimi i Librit të Qytetit të Nju Jorkut për autorë debutues dhe ishte gjithashtu finaliste për Çmimin për Novelën e Parë të Qendrës për Fiksion, një ndër institucionet më prestigjioze amerikane të letërsisë bashkëkohore.

Për më tepër, platforma letrare Debutiful, e njohur për promovimin e autorëve të rinj, e shpalli “Misinterpretation” si librin më të mirë të vitit 2024.

Ledia Xhoga ka lindur dhe është rritur në Tiranë, ndërsa prej vitesh jeton dhe krijon në Brooklyn, New York. Zëri i saj i veçantë letrar, që gërsheton realitetin shqiptar me tematika universale, duket se ka gjetur jehonë në arenën ndërkombëtare – dhe rruga drejt finales së Booker Prize sapo ka nisur.

The post Ledia Xhoga në garë për “Booker Prize”, e dyta shqiptare pas Ismail Kadaresë appeared first on Albinfo.