Man United projekton transferimin e lojtarit që nuk është i dëshiruar më te Barcelona

Manchester United ka shfaqur interesim serioz për mesfushorin premtues të Barcelonës, Fermin Lopez, dhe sipas “SPORT”, është gati të paraqesë një ofertë që kalon shifrën e 70 milionë eurove. Trajneri i ri i “Djajve të Kuq”, Ruben Amorim, e sheh 22-vjeçarin si një pjesë kyçe të projektit të tij.

Barcelona është në dijeni të interesimit nga Anglia, edhe pse deri tani nuk është paraqitur ndonjë ofertë zyrtare. Megjithatë, burime brenda klubit katalanas pranojnë se një marrëveshje e mundshme mund të konkretizohet në javët në vijim, pasi klubi ka planifikuar shitje të rëndësishme gjatë fazës së fundit të merkatos.

Fermin, produkt i akademisë “La Masia”, konsiderohet si një mesfushor i kompletuar: teknik, i zhdërvjellët dhe me ndjenjë për golin. Manchester United është i gatshëm t’i ofrojë një kontratë me pagë të dyfishuar, në një përpjekje për ta bindur lojtarin të kalojë në Ligën Premier.

Pavarësisht ofertave të mëparshme nga Chelsea, Arsenal dhe madje edhe nga Arabia Saudite, Fermin ka qëndruar i përkushtuar ndaj Barcelonës dhe ka refuzuar çdo lëvizje. Ai dhe stafi i tij kanë theksuar në mënyrë të përsëritur se qëndrimi në “Camp Nou” është prioriteti i tij.

Megjithatë, Barcelona është e hapur për negociata nëse oferta kalon 70 milionë euro, një shumë që do të ndihmonte ndjeshëm situatën financiare të klubit. Një shitje e tillë do t’u mundësonte katalanasve të aktivizonin rregullin 1:1 të La Ligas, duke regjistruar blerje të reja dhe rinovime kontratash.

Trajneri Hansi Flick vlerëson lart Fermin Lopezin, por konkurrenca në mesfushë është rritur ndjeshëm. Edhe pse do të preferonte të largonte lojtarë të tjerë më parë, Flick nuk do ta kundërshtonte largimin e Ferminit nëse shitet për një shumë të konsiderueshme.

Në fund, vendimi i përket vetë lojtarit. Ai është i vetëdijshëm për konkurrencën e fortë në skuadër, por gjithashtu për rolin e rëndësishëm që pati sezonin e kaluar. Me ofertën e United që premton përfitime financiare të mëdha, Fermin pritet të vendosë së shpejti për të ardhmen e tij – dhe Barcelona është e gatshme ta dëgjojë.