Bora mbyll disa rrugë malore në Zvicër, vështirësohet qarkullimi në Alpe

Reshjet e para të dendura të borës në Alpet zvicerane po shkaktojnë vështirësi në qarkullimin rrugor, duke detyruar autoritetet të mbyllin disa kalime malore më herët se zakonisht, përcjell albinfo.ch.

Sipas informacioneve të Klubit Zviceran të Automobilizmit (TCS), rrugët malore Gotthard dhe San Bernardino janë mbyllur për qarkullim, ndërsa kufizime të ngjashme janë vendosur edhe në kalimet Nufenen, Grimsel dhe Susten.

Mbylljet janë ndërmarrë për arsye sigurie, pasi reshjet e borës, temperaturat e ulëta dhe kushtet e rrëshqitshme po e bëjnë të rrezikshëm qarkullimin në lartësitë malore.

Për disa prej këtyre rrugëve ende nuk është caktuar një datë e saktë e rihapjes. Autoritetet do ta rivlerësojnë situatën në varësi të kushteve atmosferike dhe sigurisë së qarkullimit.

Edhe kalimi malor Furka është i mbyllur përkohësisht, ndërsa një vlerësim i ri i gjendjes së rrugës është paraparë për të hënën, më 26 tetor.

Megjithatë, jo të gjitha rrugët malore janë të bllokuara. Kalimet Albula, Flüela, Bernina, Julier dhe disa lidhje të tjera alpine vazhdojnë të jenë të hapura, por në disa segmente ka borë dhe rrezik nga ngricat.

Kushtet atmosferike mund të ndryshojnë shpejt, prandaj drejtuesve të automjeteve u rekomandohet të përdorin pajisje të përshtatshme dimërore dhe të kontrollojnë informacionet për qarkullimin përpara udhëtimit.

Mbyllja e kalimeve malore mund të ndikojë veçanërisht te udhëtarët që lëvizin ndërmjet kantoneve zvicerane dhe drejt zonave kufitare me Italinë.

Për udhëtarët që përdorin këto rrugë, rekomandohet planifikimi i itinerareve alternative dhe ndjekja e njoftimeve të autoriteteve përkatëse.

TCS bën të ditur se situata në rrugët alpine po monitorohet vazhdimisht, ndërsa ndryshimet e motit mund të sjellin kufizime të tjera gjatë fundjavës./Albinfo.ch

The post Bora mbyll disa rrugë malore në Zvicër, vështirësohet qarkullimi në Alpe appeared first on Albinfo.

Burimi i lajmit: albinfo.ch
Shënim: Ky material është përpunuar për qëllime informimi nga Portali Kosova.Today.