Nobeli i Letërsisë shkon në Hungari/ László Krasznahorkai u nderua për veprën e tij vizionare

Çmimi Nobel në Letërsi për vitin 2025 iu dha autorit hungarez László Krasznahorkai. (Lazlo Kraznahorkai)

Shkrimtari u zgjodh fitues për veprën e tij bindëse dhe vizionare që, në mes të terrorit apokaliptik, riafirmon fuqinë e artit.

Kraznahorkai është një romancier dhe skenarist hungarez i njohur për prozën e tij komplekse dhe sfiduese.

I lindur në Gyula të Hungarisë, në vitin 1954, Kraznahorkai la gjurmë për herë të parë me romanin e tij të parë të vitit 1985, Sátántangó, një portretizim i zymtë dhe magjepsës i një komuniteti rural në rënie.

Vepra të tilla si Satantango dhe Melankolia e Rezistencës, vlerësohen për stilin e tyre postmodern, temat distopiane dhe kërkimet e thella filozofike. Ai është nderuar më parë me Çmimin Ndërkombëtar Man Booker.

Shkrimi i Kraznahorkai karakterizohet nga fjali të gjata dhe komplekse dhe një angazhim i thellë me temat e dëshpërimit, bukurisë dhe gjendjes njerëzore. Veprat e tij shpesh eksplorojnë mjedise distopiane dhe pyetje filozofike, duke bërë krahasime me autorë si Kafka dhe Beckett.

Fituesi merr një shpërblim në para prej 11 milionë kronash suedeze, pak më shumë se 1 milion dollarë, një medalje ari dhe një certifikatë.

Tashmë janë dhënë çmimet Nobel në mjekësi, fizikë dhe kimi dhe priten çmimet në Paqe dhe Ekonomi.

Çmimet Nobel u krijuan sipas testamentit të Alfred Nobel, shpikësit suedez të dinamitit, i cili kërkoi që me pasurinë e tij të krijohej një fond. Interesi nga ai fond do të përdorej për të dhënë çmime vjetore për ata që i kanë dhënë kontributet më të mëdha njerëzimit./abcnews.al