Osmani kërkon përkrahjen e Austrisë dhe Sllovenisë për integrimin evropian

Presidentja e Republikës së Kosovës, Vjosa Osmani, ka pritur sot në takim Ministren Federale të Austrisë për Evropë, Integrim dhe Familje, Claudia Plakolm, si dhe Sekretaren e Shtetit të Sllovenisë për Çështje Evropiane, Neva Grašič.

Gjatë takimit u diskutua për marrëdhëniet e shkëlqyera që Kosova gëzon me Austrinë dhe Slloveninë, si dhe për mundësitë e thellimit të bashkëpunimit në fushën e integrimit evropian. Presidentja Osmani ka falënderuar dy zyrtaret për mbështetjen e vazhdueshme që vendet e tyre i kanë dhënë Kosovës, si dhe për kontributin e tyre në promovimin e stabilitetit rajonal.

Në vijim të bisedës, Presidentja Osmani ka theksuar progresin e Kosovës në zbatimin e reformave evropiane dhe ka kërkuar përkrahjen e Austrisë dhe Sllovenisë për heqjen e masave kufizuese të Bashkimit Evropian, të cilat i ka cilësuar të pajustifikuara krahasuar me arritjet e Kosovës.

Ajo gjithashtu ka shprehur shpresën se këto dy vende mike do të jenë ndër zërat më të fuqishëm për avancimin e aplikimit të Kosovës për statusin e vendit kandidat në BE, njësoj siç kanë mbështetur edhe shtetet e tjera të rajonit në proceset e tyre integruese.

Në përfundim të takimit, Presidentja Osmani ka nënvizuar se Kosova mbetet e përkushtuar ndaj vlerave evropiane të demokracisë, barazisë dhe të drejtave të njeriut, ndërsa ka theksuar se miqësia dhe partneriteti me Austrinë dhe Slloveninë përbëjnë shtylla të rëndësishme të politikës së jashtme të vendit.

The post Osmani kërkon përkrahjen e Austrisë dhe Sllovenisë për integrimin evropian appeared first on Albinfo.