“Pena që lëvron jetë”: Letërsia dhe kultura shqiptare ndriçojnë në zemër të Londrës

Në Ambasadën e Republikës së Kosovës në Londër u zhvillua edicioni i dytë i aktivitetit kulturor “Pena që lëvron jetë”, një projekt që ka për synim promovimin e figurave të shquara të letërsisë dhe kulturës shqiptare, transmeton albinfo.ch.

Ideuar dhe moderuar nga Znj. Anila Kadija, kjo nismë kulturore vazhdon të krijojë ura lidhëse mes komunitetit shqiptar në diasporë dhe trashëgimisë sonë shpirtërore. Këtë vit, në qendër të vëmendjes ishin dy autorë të spikatur: Znj. Valbona Ismaili Luta dhe Z. Durim Taçi, të cilët ndanë me publikun pjesë nga krijimtaria dhe rrugëtimi i tyre letrar.

Mbrëmja u pasurua gjithashtu me interpretimin virtuoz të violinistes Znj. Kristiana Zotkaj, e cila shtoi ndjeshmërinë artistike të eventit, duke krijuar një atmosferë të veçantë emocionale.

Në fjalën e tij përshëndetëse, Zv/ambasadori i Kosovës në Londër, z. Vlorat Gashi, theksoi rëndësinë e këtyre organizimeve në ruajtjen e identitetit kulturor të shqiptarëve jashtë atdheut:

“Ky projekt është një mundësi e artë për të promovuar vlerat tona kombëtare, për të nxitur bashkëpunimin mes artistëve dhe për të mbajtur gjallë lidhjen me rrënjët tona.”

“Pena që lëvron jetë” konfirmoi edhe një herë se arti dhe letërsia janë ura që i bashkojnë njerëzit, pavarësisht largësisë gjeografike. Ky aktivitet nuk ishte vetëm një mbrëmje arti, por një dëshmi e gjallë e gjurmës që kultura shqiptare lë kudo ku ajo përqafohet. /Albinfo.ch

The post “Pena që lëvron jetë”: Letërsia dhe kultura shqiptare ndriçojnë në zemër të Londrës appeared first on Albinfo.