AfD premton heqjen e euros dhe daljen nga Shengeni

Bashkëkryetarja e Alternativës për Gjermaninë (AfD), Alice Weidel, ka deklaruar se partia e saj do të heqë euron dhe do të mbyllë kufijtë gjermanë nëse vjen në pushtet dhe siguron shumicën në nivel federal.

Në një intervistë për televizionin publik gjerman ZDF, Weidel e cilësoi euron si një “monedhë të paqëndrueshme” dhe tha se AfD mbetet e vendosur për tërheqjen e Gjermanisë nga sistemi i euros, ashtu siç parashihet në programin zgjedhor të partisë.

Sipas saj, futja e euros ka sjellë pasoja negative ekonomike dhe ka kontribuar në varfërimin e shtresave punëtore.

AfD kërkon mbylljen e kufijve dhe daljen nga Shengen

Weidel kritikoi ashpër politikën aktuale të migracionit në Gjermani, duke pretenduar se vendi ka kufij të hapur dhe se “çdokush mund të hyjë”.

“Ne themi shumë qartë: do t’i mbyllim kufijtë”, deklaroi ajo.

Ajo paralajmëroi gjithashtu se AfD do të tërhiqte Gjermaninë nga Marrëveshja e Shengenit, duke thënë se marrëveshja do të duhej të përfundonte.

Premton kthimin e refugjatëve sirianë

Weidel u shpreh edhe për çështjen e refugjatëve sirianë në Gjermani. Sipas saj, rreth 1.3 milionë shtetas sirianë jetojnë në vend dhe ajo pretendon se ata duhet të kthehen në Siri.

Ajo kërkoi gjithashtu që Gjermania të ndalojë dhënien e shtetësisë personave që, sipas saj, duhet të largohen nga vendi.

AfD synon pushtetin në nivel federal

Duke folur për zgjedhjet e ardhshme në disa lande gjermane, Weidel shprehu bindjen se AfD do të arrijë sukses të madh elektoral.

“Do të qeverisim në landet e para federale”, deklaroi ajo, duke shtuar se synimi i partisë është të vijë në pushtet edhe në nivel federal.

“Do t’u tregojmë njerëzve se çfarë mund të bëjmë”, tha Weidel. (INA)

Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.