Presidenti i Argjentinës: Vlerësoj Donald Trump për marrjen e vendimeve të vështira

Presidenti ultraliberal i Argjentinës, Javier Milei vlerësoi sot aleatin e tij amerikan, Donald Trump para Asamblesë së Përgjithshme të OKB-së Ai tha se “Trump po merr vendime të vështira” për të shmangur një “katastrofë në Shtetet e Bashkuara” dhe në botë.

”Në këtë moment historik, Donald Trump e kupton se duhet të bëjë atë që është e nevojshme, edhe nëse kjo nuk i pëlqen shumë njerëzve, përpara se të jetë tepër vonë”, deklaroi udhëheqësi argjentinas në fjalimin e tij, i dyti para Asamblesë së Përgjithshme që nga zgjedhja e tij në fund të vitit 2023.

Javier Milei vlerësoi veçanërisht “politikën e vendosur dhe të suksesshme” të presidentit Trump kundër imigracionit të paligjshëm, “ristrukturimin e tij të paparë të kushteve të tregtisë ndërkombëtare” dhe “spastrimin e kontrollit institucional mbi shtetin amerikan”.

Në fjalimin e tij, Javier Milei përsëriti kritikat ndaj funksionimit të OKB-së, kundër së cilës ai kishte udhëhequr një sulm të ashpër vitin e kaluar nga ky podium, duke e quajtur atë një organizatë që ishte bërë “një model i qeverisjes mbikombëtare nga burokratët ndërkombëtarë që pretendojnë se u imponojnë një mënyrë specifike jetese qytetarëve të botës”.

Ai i përsëriti këto fjalë edhe sot.

Në vend të kësaj, ai i bëri thirrje OKB-së të ndjekë një “rrugë të ngjashme” me atë të Argjentinës, një rrugë “optimizimi” dhe “riorganizimi”, duke përfshirë kryerjen e “auditeve të besueshme, mbylljen e programeve joefektive, konsolidimin e agjencive të vetme dhe kushtëzimin e financimit nga rezultate të verifikueshme”.