Prokurorët kërkojnë vendim urgjent nga Kushtetuesja: Rrezikohet pavarësia e Prokurorisë
Këshilli i Prokurorëve Publikë, Prokuroria Publike dhe Shoqata e Prokurorëve Publikë i kanë bërë thirrje Gjykatës Kushtetuese që të veprojë urgjentisht lidhur me iniciativat për vlerësimin e kushtetutshmërisë së ndryshimeve ligjore, me të cilat për herë të tretë janë ulur koeficientët për llogaritjen e pagave të prokurorëve publikë.
Ata paralajmërojnë se zvarritja e mëtejshme e vendimmarrjes mund të rrezikojë pavarësinë e Prokurorisë dhe të shkaktojë largim të konsiderueshëm të kuadrit profesional.
Në një komunikatë të përbashkët, tri institucionet dhe organizatat shprehin shqetësim serioz për faktin se Gjykata Kushtetuese ka më shumë se tetë muaj që nuk ka marrë vendim përfundimtar lidhur me iniciativat e paraqitura për dispozitat e kontestuara të Ligjit për pagat e prokurorëve publikë dhe Ligjit për pagat e anëtarëve të Këshillit të Prokurorëve Publikë, raporton 4news.mk.
Sipas tyre, ulja e koeficientëve nuk është vetëm çështje e lartësisë së pagave, por prek drejtpërdrejt pavarësinë e Prokurorisë Publike dhe krijon një çekuilibër serioz ndërmjet funksionit gjyqësor dhe atij prokurorial, në kundërshtim me standardet evropiane dhe ndërkombëtare.
Nga radhët e prokurorisë rikujtojnë se edhe vetë Gjykata Kushtetuese, në vendimin për nisjen e procedurës për vlerësimin e kushtetutshmërisë, kishte shprehur dyshime për kushtetutshmërinë e ndryshimeve ligjore.
“Gjykata shprehu dyshimin se ligjvënësi, me uljen e koeficientëve për llogaritjen e pagave të prokurorëve publikë dhe të anëtarëve të Këshillit të Prokurorëve Publikë, ka ndërhyrë në pavarësinë dhe mëvetësinë e Prokurorisë Publike të garantuar me Kushtetutë”, thuhet në një pjesë të arsyetimit të Gjykatës Kushtetuese.
Në vendim theksohet gjithashtu se ndryshimet e tilla ligjore vënë në pikëpyetje realizimin e së drejtës kushtetuese të të punësuarve për shpërblim të përshtatshëm për punën e tyre.
Prokurorët vlerësojnë se çdo vonesë e mëtejshme është e pajustifikueshme, veçanërisht duke pasur parasysh se Gjykata Kushtetuese tashmë ka nisur procedurën dhe ka shprehur dyshime për kushtetutshmërinë e dispozitave të kontestuara.
Ata paralajmërojnë se vënia në pikëpyetje e parimeve të pavarësisë dhe mëvetësisë së Prokurorisë mund të krijojë një precedent të rrezikshëm, duke nxitur largimin e prokurorëve dhe duke vështirësuar më tej funksionimin e institucionit.
Në komunikatë pretendohet gjithashtu se pagat e prokurorëve publikë në Maqedoninë e Veriut janë më të ulëtat krahasuar me vendet e tjera të rajonit.
Probleme shtesë, sipas tyre, janë mungesa kronike e personelit administrativ dhe profesional, mjetet e pamjaftueshme buxhetore dhe kushtet joadekuate të punës. Ata vlerësojnë se kjo gjendje po bëhet e paqëndrueshme dhe mund të ndikojë drejtpërdrejt në mbrojtjen e të drejtave të qytetarëve.
Këshilli i Prokurorëve Publikë, Prokuroria Publike dhe Shoqata e Prokurorëve presin që këto probleme të pasqyrohen edhe në raportin e ardhshëm të Komisionit Evropian për Maqedoninë e Veriut, si një hap prapa dhe një rrezik shtesë për pavarësinë e Prokurorisë Publike.
Në fund, ata i bëjnë thirrje sërish Gjykatës Kushtetuese që të shqyrtojë argumentet e paraqitura në iniciativat përkatëse, të mbështetura me analiza krahasuese nga vendet e rajonit dhe të Evropës, dhe të marrë një vendim që, sipas tyre, do të korrigjonte padrejtësinë e bërë ndaj Prokurorisë Publike, si një nga shtyllat kryesore të shtetit të së drejtës.
Burimi i lajmit: ina-online.net
Shënim: Ky material është përpunuar për qëllime informimi nga Portali Kosova.Today.
