Reshjet e shiut bllokuan edhe Çairin, kanalizimet atmosferike pa kapacitet të përçojnë ujërat (Foto)

Reshjet e djeshme të shiut kanë shkaktuar dëme të mëdha edhe në Shkup. Përkatësisht komuna e Çairit edhe këtë herë u përshi nga përmbytje të pjesshme të cilat vijnë nga kanalizimet atmosferike, të cilat nuk kanë kapacitet të përçojnë ujin nga moti i tillë. Këtë e pranuan edhe nga Ndërmarrja Publike “Ujësjellësi dhe Kanalizimi”. Qytetarët së bashku me ekipet në teren, riparojnë dëmet e shkaktuara, shkruan Portalb.mk.

Pasditen e djeshme, pas Pollogut reshjet u zhvendosën në Shkup, kështu duke shkaktuar dëme nga më të ndryshmet.

Qendra për Menaxhim me Kriza në raportin e dhënë rreth paraqitjeve për problemet e shkaktuara nga moti i keq njoftoi se janë adresuar më shumë se 100 dëme të shkaktuara, kryesisht vërshime brenda shtëpive, bllokim i rrugëve nga drunjtë, këputje e telave përçues të rrymës elektrike etj, por pa viktima të evidentuara.

Në Çair gjendja paraqitet e njëjtë çdoherë kur ka vërshime për vite me radhë. Në redaksinë tonë erdhën dhjetëra porosi, fotografi e pamje nga vendet e përfshira nga moti i keq. Rruga Cvetan Dimov e cila ndahet nga murri pengonte rrjedhën e duhur të ujit që u mblodh nga reshjet e dendura dhe kanalet atmosferike nuk arritën ta përçojnë ujin e tepërt, gjendja e njëjtë ishte edhe në bulevardin Hristijan Todorovski dhe atë Nikolla Karev.

Përmbytje e pjesshme në Çair. Foto e siguruar për Portalb.mk

Redaksia e Portalb.mk kontaktoi N.P. “Ujësjellësi dhe Kanalizimi”, për problemet e lartë përmendura, mirëpo ata na njoftuan se kapaciteti aktual i gypave, nuk korrespondon me motin e tillë dhe se ekipet ishin në teren që nga orët e para të mëngjesit.

“Kjo ndodhi për shkak të motit të keq. Aq është kapaciteti i kanalizimit atmosferik dhe linjave. Të gjithë ekipet, sot, që në orët e para të mëngjesit janë në teren dhe po punojnë” thanë nga N.P. “Ujësjellësi dhe Kanalizimi”.

Në teren përpos tyre, pamë edhe kompani private që merreshin me pastrimin e kanalizimit. Ata thanë se janë angazhuar nga një biznes privat dhe se të njëjtat i mirëmbajnë me kërkesë të tyre, ndërkaq rrugëve hasëm në shumë drunj dhe gjethe të shpërndara gjithandej, ekipet nga N.P. Higjiena Komunale – Shkup, ende nuk kishin dalë në teren, dhe qytetarët me vetë iniciativë mblidhnin mbetjet.

Kompani private mirëmbajnë kanalizimin në Çair, foto nga Portalb.mk

Në parkun e Çairit punonjësit e N.P. “Parqe dhe Gjelbërime” – Shkup, kishin mbledhur drunjtë e rënë dhe prerë disa të tjerë që ishin rrezik potencial. Ata për Portalb.mk thanë se janë në teren që në orët e para të mëngjesit, dhe po punojnë në pjesën e tyre.

“Sot jemi në teren nga ora 06:00. Kishte drunjë të rënë gjithandej, të njëjtit i kemi prerë dhe tubuar. Nuk kemi hasur në ndonjë kabllo të këputur apo dëm më serioz. Ekipi ynë përfshin një pjesë të Çairit”, thanë punonjësit.

Bizneset që ndodhen në rrugët e përfshira nga përmbytjet e pjesshme, thanë se kanë dëme materiale, por të njëjtit nuk pranuan të prononcohen me deklarata. Ata në vazhdim prapa kamerave tona, thonë se dëmet i riparojnë nga buxheti personal, ngase vlerësimet dhe institucionet çalojnë në aktivitetet e tyre, dhe se burim i vetëm i të ardhurave ngelen bizneset që ata posedojnë.

Nga Komuna e Çairit nuk u përgjigjën në pyetjet gazetareske për këto probleme.

Përndryshe, Drejtoria për Çështje Hidrometeorologjike ditë më parë kishte paralajmëruar për një stuhi që i afrohej vendit dhe për reshje të dendura shiu. Qendra për menaxhimin e krizave (QMK) duke iu referuar njoftimit të Drejtorisë për punë hidrometereologjike, kishte paralajmëruar njashtu për motin e keq.

Kujtojmë se disa lagje nga Çairi edhe më herët janë përmbytur nga moti i keq.

LEXO: Spitali dhe shtëpitë nën ujë, Tetova edhe këtë herë e papërgatitur për vërshimet (Video) LEXO: Reshjet e shiut shkaktuan dëme dhe bllokuan disa rrugë në Tetovë (FOTO+VIDEO) LEXO: “Serova” tërë natën “zgjuar” nga vërshimet: Le që s’vijnë të na ndihmojnë, por as telefonin s’e hapin (FOTO&VIDEO) LEXO: Probleme me kanalizimin, nuk duhet shumë për t’u vërshuar Çairi