Roja Bregdetare Amerikane ka sekuestruar 34 tonë kokainë, arrestohen 60 kontrabandistë

Njësitë e Rojës Bregdetare Amerikane, që veprojnë nën mbikëqyrjen e Departamentit të Sigurisë Kombëtare, kanë sekuestruar më shumë se 34 tonë kokainë gjatë një operacioni të madh në Oqeanin Paqësor.

“Ngarkesa me kokainë është kapur nga oficerët e Rojës Bregdetare në Oqeanin Paqësor si pjesë e një operacioni të fokusuar në luftimin e kontrabandës së drogës drejt vendit”, njoftoi Departamenti i Sigurisë Kombëtare. Operacioni, i cili nga departamenti quhet “Parandalimi i Karteleve”, ishte pjesë e operacionit në vazhdim të quajtur “Gjarpri i Paqësorit”, që synon rrugët tregtare përmes ujërave ndërkombëtare.

“Operacioni Gjarpri i Paqësorit vazhdon përpjekjet e Rojës Bregdetare për të mbrojtur atdheun, për të luftuar narkoterrorizmin dhe për të shkatërruar organizatat e huaja terroriste dhe organizatat kriminale transnacionale dhe kartelet që synojnë të prodhojnë dhe të tregtojnë drogë të paligjshme në Shtetet e Bashkuara”, thuhet në një deklaratë të publikuar në faqen zyrtare të Rojës Bregdetare Amerikane.

Sipas raporteve të mediave amerikane, rreth 60 persona janë arrestuar në lidhje me operacionin. Më herët, zyrtarët amerikanë publikuan pamje ajrore që tregojnë sulme ndaj anijeve të dyshuara për transport të trafikantëve të drogës.

Pamjet kanë shkaktuar kritika dhe shqetësim për mundësinë e ekzekutimeve jashtëgjyqësore. Çështja e të shtënave ajrore mbi anije u ngrit gjatë një konference për shtyp në Shtëpinë e Bardhë, ku gazetarët pyetën presidentin amerikan, Donald Trump për ligjshmërinë dhe pasojat e veprimeve të tilla.